Dimri “sulmon” flokët? Ja pse shtohet rënia dhe çfarë duhet të bëni

Nëse kohët e fundit po vini re më shumë flokë në furçë apo në dush, nuk jeni të vetmit. Specialistët thonë se edhe pse vjeshta njihet si periudha tipike e rënies së flokëve, muajt e dimrit ndikojnë ndjeshëm në ciklin e tyre natyral.

Çdo fije floku kalon në tre faza: rritje, tranzicion dhe pushim. Në fund të fazës së pushimit, floku bie për t’i hapur rrugë një fijeje të re, një proces plotësisht normal. Por gjatë dimrit, për shkak të temperaturave të ulëta dhe pakësimit të orëve me dritë, më shumë folikula mund të hyjnë njëkohësisht në fazën e pushimit. Rezultati? Rënie më e theksuar pas disa muajsh.

Lexo gjithashtu: Misteri i bakterit 5000-vjeçar në Rumani që i bën rezistencë antibiotikëve modernë

Reduktimi i ekspozimit në diell mund të ndikojë edhe në nivelin e vitaminës D, një faktor i rëndësishëm për shëndetin e flokëve. Disa teori sugjerojnë se gjatë verës organizmi mban më shumë flokë si mbrojtje nga rrezet UV, ndërsa me ardhjen e dimrit një pjesë e tyre përfundon ciklin jetësor.

Kushtet atmosferike janë një tjetër faktor. Ajri i ftohtë jashtë dhe ngrohja në ambiente të mbyllura ulin lagështinë, duke e bërë skalpin më të thatë dhe flokët më të brishtë. Shpesh, këputja e fijes – që dallohet nga mungesa e rrënjës, ngatërrohet me rënie të vërtetë.

Edhe kapelat e dimrit mund të ndikojnë, për shkak të fërkimit dhe grumbullimit të djersës apo yndyrës në skalp, nëse nuk mbahet higjienë e rregullt.

Për të minimizuar efektet sezonale, ekspertët rekomandojnë:

• përdorimin e shampove të buta që ruajnë balancën natyrale të skalpit;

• aplikimin e balsameve dhe maskave hidratuese;

• kujdes me tharëset dhe mjetet me nxehtësi;

• ekspozim të moderuar në diell dhe kontroll të nivelit të vitaminës D, nëse është e nevojshme.

Në shumicën e rasteve, rënia sezonale është e përkohshme. Por nëse zgjat më shumë se disa muaj ose shoqërohet me hollim të dukshëm të flokëve, konsultimi me një specialist mbetet hapi më i sigurt.