Dashuria nuk është vetëm çështje emocionesh,ajo mund të jetë edhe një aleate e fuqishme e zemrës. Një rishikim i ri shkencor sugjeron se marrëdhëniet e forta dhe mbështetëse mund të ndihmojnë realisht në përmirësimin e shëndetit të personave që vuajnë nga sëmundjet kardiovaskulare.
Dihet se humbjet e mëdha emocionale, si vdekja e një personi të dashur, mund të shkaktojnë të ashtuquajturën “sindromë të zemrës së thyer”, një gjendje e përkohshme që prek funksionimin e zemrës. Por studimi i fundit tregon se ana tjetër e medaljes është po aq e fortë: dashuria, përkujdesja dhe mbështetja emocionale mund të ndihmojnë zemrën të shërohet.
Sëmundjet e zemrës janë shkaku kryesor i vdekjeve në mbarë botën, dhe gjithnjë e më shumë ekspertë theksojnë se rikuperimi nuk është vetëm fizik, por edhe emocional dhe social. Në këtë kuadër, janë analizuar 12 studime që përfshinin pacientë me probleme kardiake dhe partnerët e tyre, për të vlerësuar ndikimin e programeve të trajtimit të bazuara te çiftet.
Rezultatet janë domethënëse: 77% e studimeve treguan përmirësime të sjelljeve shëndetësore, si ndjekja e rregullt e aktivitetit fizik, marrja korrekte e medikamenteve dhe lënia e duhanit. Ndërsa efektet në mirëqenien mendore, marrëdhënien në çift dhe cilësinë e jetës ishin të përziera ose jo gjithmonë statistikisht të forta, ndikimi pozitiv në zakonet e përditshme ishte i qartë.
“Sëmundja e zemrës ndonjëherë i afron çiftet, por shpeshherë është një provë e vështirë për marrëdhënien,” shprehet Heather E. Tulloch, autore kryesore e studimit. “Ngjarjet kardiake nuk i ndodhin vetëm pacientit, por gjithë çiftit.”
Ndryshe nga kujdesi tradicional kardiak, i cili fokusohet vetëm te pacienti, këto programe përfshijnë edhe partnerin në procesin e shërimit: nga gatimi i ushqimeve të shëndetshme, te inkurajimi për aktivitet fizik dhe kujtesa për marrjen e ilaçeve. Një rol që po rezulton vendimtar në rikuperim.
Për këtë arsye, gjithnjë e më shumë spitale dhe sisteme shëndetësore po i japin përparësi kujdesit të orientuar nga familja, i cili jo vetëm ndihmon pacientin, por mund të përmirësojë edhe shëndetin e vetë partnerit.
Ekspertët propozojnë edhe një model të ri rehabilitimi kardiak, të quajtur “stepped care”, që synon të identifikojë në kohë problemet emocionale dhe të ofrojë mbështetje të përshtatshme për çiftet që përballen me stres dhe ankth pas sëmundjes.
“Duhet të trajtojmë zemrën dhe njëkohësisht të ushqejmë marrëdhëniet,” thekson Tulloch. “Kjo mund të përmirësojë sjelljet shëndetësore, shëndetin mendor dhe, ndoshta, edhe rezultatet kardiovaskulare.”
Mesazhi është i qartë, dashuria, mbështetja dhe lidhjet njerëzore nuk janë thjesht emocione, ato mund të jenë pjesë e terapisë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
