Çmimet e naftës u rritën të hënën në mëngjes në tregjet evropiane, pasi grupi OPEC+ njoftoi një shtim të moderuar të prodhimit mujor, duke qetësuar frikën për një rritje më të fortë të ofertës.
Pas takimit të së dielës, aleanca vendosi të rrisë prodhimin me 137,000 fuçi në ditë për muajin nëntor, e njëjta sasi që ishte shpallur për tetorin.
Nafta bruto amerikane (WTI) u rrit me 1.31%, duke arritur në 61.68 dollarë për fuçi, ndërsa Brent u ngjit me 1.22% në 65.32 dollarë për fuçi. Megjithatë, çmimet mbeten më të ulëta krahasuar me javën e kaluar, pas lajmeve për mundësi të reja shtese në prodhimin e OPEC+.
Në pesë ditët e fundit, WTI ka rënë me 2.79%, ndërsa Brent me 3.9%, me tregjet që të premten shënuan nivelet më të ulëta në katër muajt e fundit.
Luhatjet vijnë pas një periudhe rritjeje të fortë më herët këtë vit, kur çmimet kaluan 80 dollarë për fuçi, si pasojë e tensioneve midis Iranit, Izraelit dhe Shteteve të Bashkuara. Konflikti kishte ngritur shqetësime se Irani mund të bllokonte ngushticën e Hormuzit — një nga rrugët më të rëndësishme të transportit të naftës në botë.
Lexo edhe: Future2Tech 2025, mbi 5000 vizitorë dhe mbështetje për startup-et dhe bizneset
OPEC+, i përbërë nga 12 vende anëtare dhe 10 partnerë, përfshirë Arabinë Saudite dhe Rusinë, ka vijuar të rrisë gradualisht prodhimin gjatë këtij viti, pas uljeve të forta të bëra në 2023 dhe 2024.
Në deklaratën e së dielës, grupi theksoi se vendimi për rritje të kufizuar të prodhimit është marrë “në dritën e perspektivës së qëndrueshme ekonomike globale dhe kushteve të shëndetshme të tregut, të reflektuara në nivelet e ulëta të rezervave të naftës”.
Megjithatë, analistë të ndryshëm, përfshirë ata të Agjencisë Ndërkombëtare të Energjisë, paralajmërojnë se furnizimi mund të tejkalojë kërkesën, kryesisht për shkak të prodhimit të lartë nga vendet e Amerikës.
Takimi i radhës i OPEC+ është planifikuar më 2 nëntor.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
