Chris Kempczinski, CEO i McDonald’s, ka ndarë parashikimet e tij mbi drejtimet kryesore që do të ndikojnë industrinë ushqimore gjatë vitit 2026.
Në një video të publikuar së fundmi në Instagram, drejtuesi i gjigantit të fast food-it përmendi tre tendenca kryesore që, sipas tij, do të fitojnë terren në vitin e ardhshëm: ushqimet e pasura me fibra, kombinimet e shijeve të ëmbla dhe pikante, si dhe inovacionin në pije.
“Numri 1: fibra do të jetë një trend i madh. Numri 2: kombinimi i shijes së ëmbël me atë pikante do të jetë shumë në modë. Dhe numri 3: do të shohim shumë risi në kategorinë e pijeve. Këto janë tre parashikimet e mia për vitin 2026, dhe ndihem i sigurt për to,” tha Kempczinski.
Ai gjithashtu u kthye pas për të reflektuar mbi parashikimet e tij për 2025, duke thënë se i kishte goditur të tre trendet kryesore. “Duhet të bëj pak “xhiro nderi”, sepse vitin e kaluar, kur më pyetën për parashikimet e 2025-s, thashë se tre gjëra do të ishin të mëdha: proteina, inteligjenca artificiale dhe salcat. Dhe mendoj se i qëllova të treja, jo keq,” shtoi ai me humor.
Lexo edhe: McDonald’s rikthen një produkt legjendar, dhe ja pse ky vendim është një leksion biznesi
Kempczinski, i cili mori drejtimin e McDonald’s në nëntor 2019, është mjaft aktiv në rrjetet sociale dhe shpesh ndan mendime mbi karrierën, lidershipin dhe kulturën e punës. Llogaria e tij në Instagram numëron mbi 57,000 ndjekës dhe përmban video ku ai jep këshilla profesionale, flet për “impostor syndrome” (ndjenjën e të qenit i papërshtatshëm pavarësisht suksesit), si dhe provon produkte të reja të McDonald’s.
Në një video të fundit me titull “Tough Love with the McDonald’s CEO”, ai u bëri thirrje profesionistëve të rinj që të marrin përgjegjësi për rrugëtimin e tyre në karrierë.
“Këshilla ime është kjo: mos harroni se askush nuk kujdeset për karrierën tuaj më shumë sesa ju vetë. Ideja se dikush tjetër do të vijë dhe do t’ju hapë të gjitha dyert, është mirë nëse ndodh, por nuk duhet ta prisni. Në fund të ditës, përgjegjësia është e juaja,” theksoi ai.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
