CEO i Bank of America, Brian Moynihan, thotë se Brezi Z (të lindurit mes viteve 1997–2012) ndihet “i frikësuar” për të ardhmen e tregut të punës. Ai thekson se kriza e punësimit për të rinjtë po thellohet, ndërsa inteligjenca artificiale (AI) po tregon gjithnjë e më shumë potencial për të zëvendësuar detyrat fillestare të punës.
Megjithatë, mesazhi i Moynihan është i qartë: kjo gjeneratë mund ta kthejë ankthin në avantazh, nëse mëson si ta përdorë AI-n si mjet pune. Duke folur së fundmi për emisionin Face the Nation në CBS, Moynihan zbuloi se Bank of America ka marrë rreth 200 mijë aplikime për vetëm 2 mijë pozicione entry-level, të cilat u plotësuan në korrik. Këto shifra tregojnë konkurrencën ekstreme për vendet e para të punës në sektorin white-collar.
Kur ai i pyet punonjësit e rinj nëse ndihen “të frikësuar” nga AI dhe e ardhmja, shumica pranojnë se po. Për Moynihan, kjo është plotësisht e kuptueshme. Këshilla e tij kryesore për të diplomuarit e Brezit Z është që ta “përqafojnë” AI-n, duke e trajtuar si një aftësi për t’u zotëruar dhe jo si një forcë që do t’i zëvendësojë. “Do të jetë bota juaj përpara,” – tha ai, duke shtuar se është ende herët për të ditur saktësisht se si do të ndikojë AI tregun e punës. Sipas tij, synimi i Bank of America është që përfitimet e efikasitetit nga AI të përdoren për të nxitur rritjen, dhe jo thjesht për të ulur kostot.
Lexo edhe: Pse kompanitë po investojnë në AI, por po humbasin idetë më të mira?
Qëndrimi i Moynihan vjen në një kohë kur edhe Kryetari i Rezervës Federale të SHBA-së, Jerome Powell, si dhe ekonomistë të tregut të punës, po shprehin shqetësime për një mjedis gjithnjë e më të vështirë për të rinjtë. Në një konferencë për shtyp në shtator, Powell e përshkroi situatën si një “treg pune interesant”, ku “të rinjtë që sapo dalin nga universiteti po e kanë të vështirë të gjejnë punë”.
Sipas tij, tregu karakterizohet nga “pak largime dhe pak punësime”: kompanitë nuk po largojnë punonjës masivisht, por as nuk po punësojnë shumë të rinj. Kjo situatë godet veçanërisht Brezin Z që kërkon punën e parë.
Ndërkohë, shumë punëdhënës po përdorin AI për të automatizuar detyra që më parë kryheshin nga punonjësit junior. Për shembull, në kompaninë konsulente McKinsey, një mjet i brendshëm AI ka marrë përsipër krijimin e prezantimeve në PowerPoint dhe hartimin e propozimeve për klientët, detyra që tradicionalisht u takonin punonjësve të rinj.
Një raport nga SignalFire, që ndjek mbi 650 milionë punonjës në mbarë botën, tregon se të diplomuarit e rinj përbënin vetëm 7% të punësimeve të reja në kompanitë e mëdha të teknologjisë në vitin 2024, një rënie prej 25% krahasuar me vitin 2023. Kreu i kërkimit të SignalFire, Asher Bantock, i tha TechCrunch se ka “prova bindëse” që AI është një nga arsyet kryesore të rënies së roleve entry-level në teknologji.
Sipas tij, teknologjia po zëvendëson detyra rutinë si programimi bazik apo kërkimi financiar, role që tradicionalisht shërbenin si hapi i parë për karrierën e të rinjve. Përfundimi? Frika e Brezit Z është reale, por sipas Moynihan, çelësi i suksesit është i njëjtë: të mësojnë, të përshtaten dhe ta përdorin AI-n si aleat, jo si kërcënim.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
