Një skenë që është bërë shumë e zakonshme në ditët e sotme: familja është mbledhur rreth tryezës për një vakt të shijshëm. Pjatat e ushqimit e mbushin tryezën, dhe të gjithë janë mbledhur për të kaluar kohë së bashku. Megjithatë, diçka mungon… nuk ka biseda. Aty ku dikur kishte të qeshura, shaka apo edhe ndonjë debat, tani mbizotëron një heshtje e thellë. Të gjithë janë të fokusuar në telefonat e tyre.
Kjo varësi ndaj pajisjeve dixhitale nuk ndikon vetëm në marrëdhëniet personale, por edhe në mirëqenien mendore dhe aftësinë për të qenë produktiv. Studime të shumta kanë treguar se ekspozimi i vazhdueshëm ndaj teknologjisë mund të ulë përqendrimin, të ndikojë negativisht në kreativitet dhe të shtojë nivelin e lodhjes mendore. Për këtë arsye, një qasje gjithnjë e më e përhapur është agjërimi dixhital (digital fasting) – një praktikë që konsiston në shkëputjen nga telefonat, tabletat dhe kompjuterët për një periudhë të caktuar kohore, qoftë një orë, një mbrëmje apo edhe më gjatë.
Parandalimi i lodhjes mendore dhe djegies profesionale (burnout)
Lodhja profesionale është një fenomen i njohur tashmë prej vitesh, dhe Organizata Botërore e Shëndetësisë e ka kategorizuar si një sindromë që prek shumë profesionistë. Me përhapjen e punës në distancë, mentaliteti i të qenit gjithmonë i disponueshëm është bërë një normë. Megjithatë, studimet tregojnë se të qenit vazhdimisht i lidhur me teknologjinë nuk sjell produktivitet më të lartë. Një studim i kryer nga Universiteti i Bostonit zbuloi se nuk kishte asnjë ndryshim në cilësinë e punës midis atyre që punonin 80 orë në javë dhe atyre që thjesht pretendonin se po punonin kaq shumë. Për më tepër, sipas Harvard Business Review, truri ka një kapacitet të kufizuar për përqendrim intensiv. Kur lodhet, bëhet më i prirur ndaj shpërqendrimeve, duke e zgjatur kryerjen e një detyre të thjeshtë për shumë më gjatë.
Lexo edhe:Si introvertët mund të shfrytëzojnë forcën e tyre për të ndërtuar një markë personale të suksesshme
Rigjallërimi i kreativitetit
Përdorimi i vazhdueshëm i pajisjeve dixhitale krijon iluzionin e produktivitetit, por në të vërtetë mund të jetë një pengesë për kreativitetin. Një shembull i njohur është praktika e “Think Weeks“ e Bill Gates – periudha kur ai izolohej nga të gjitha shpërqendrimet për të lexuar dhe reflektuar. Studimet sugjerojnë se mendja ka nevojë për periudha qetësie për të zhvilluar ide të reja. Një studim tregoi se edhe detyrat monotone, si leximi i numrave në një libër telefoni, përmirësojnë kreativitetin dhe stimulimin mendor. Kjo ndodh sepse mungesa e stimujve të vazhdueshëm i jep mendjes hapësirë për të endur lirshëm dhe për të prodhuar ide të reja.
Si të zbatohet një shkëputje dixhitale?
Për të zbatuar një agjërim dixhital, është e këshillueshme të fillohet me hapa të vegjël. Fillimisht, mund të vendoset telefoni në një dhomë tjetër për një orë. Me kohën, kjo periudhë mund të zgjatet gradualisht. Një strategji e dobishme është edhe sabatiku dixhital, ku gjatë një dite në fundjavë, të gjitha pajisjet teknologjike vendosen mënjanë për të kaluar kohë në aktivitete jashtë ekranit, si leximi, ecja në natyrë apo gatimi me familjen. Studimet tregojnë se edhe prania e telefonit në afërsi mund të ndikojë negativisht në kapacitetin kognitiv, ndaj është e rëndësishme që ai të mos jetë as pranë përdoruesit. Duke qenë se teknologjia është një pjesë e pandashme e jetës moderne, është e rëndësishme të gjendet një ekuilibër i shëndetshëm. Shkëputja e herëpashershme nga pajisjet dixhitale mund të ndihmojë në parandalimin e lodhjes mendore dhe të sjellë një rigjallërim të kreativitetit. Për këtë arsye, praktikimi i agjërimit dixhital mund të jetë një hap i rëndësishëm drejt një mënyre më të qëndrueshme dhe efektive të punës dhe jetës së përditshme.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
