Nga data 4 korrik, Banka Amerikane e Investimeve (ABI Bank) është bërë zyrtarisht pronare e 100% të aksioneve të Bankës Kombëtare të Greqisë (NBG), pas një kontrate për shitblerjen e aksioneve të nënshkruar mes palëve në datën 2 shkurt 2018.
Sipas rezolutës së përthithjes, ABI Bank do të jetë aksioneri i vetëm i bankës NBG Albania dhe të dyja bankat do të bashkohen me njëra-tjetrën përmes përthithjes së Bankës NBG Albania nga Abi Bank. Pas miratimit paraprak të përthithjes nga Banka e Shqipërisë, të dyja entitetet do të shndërrohen në një të vetëm, të emërtuar Banka Amerikane e Shqipërisë, ndërsa NBG do të pushojë së ekzistuari.
Rezoluta parashikon që Abi Bank do të jetë pasues i NBG në të gjitha licencat, kontratat, marrëveshjet, veprimet dhe marrëdhëniet në të cilat NBG Al është palë, ashtu siç është rënë dakord në marrëveshjen e bashkimit.
Lexoni: NBG Shqipëri blihet nga Banka Amerikane e Investimeve ABI Bank
Sipas të dhënave nga Shoqata e Bankave, në qershor 2018, asetet e Abi Bank ishin 41.6 miliardë lekë, ose 2.9% e totalit të aseteve në sistemin bankar dhe ato të NBG rezultonin 36,5 miliardë lekë, ose 2.5, e totalit. Pas përthithjes së NBG, pesha e ABI Bank në sistemin bankar arrin në 5.4%, duke e ngjitur atë në bankën e gjashtë më të madhe në vend, pas BKT, Raiffeisen, Credins, IntesaSanpaolo dhe Societe Generale, nga e nënta që ishte më parë.
Çfarë parashikohet për punonjësit
Anëtarët e organeve drejtuese dhe CEO i Bankës NBG do të japin dorëheqjen. Ndërsa organet drejtuese, përbërja e anëtarëve dhe CEO i ABI Bank do të mbeten të njëjtë.
Lidhur me punonjësit e NBG, parashikohet që ata do të jenë punonjës të Abi bank dhe struktura organizative e ABI Bank do të përfshijë strukturën e NBG, duke zgjeruar strukturën e saj nëpërshtatje me këtë përfshirje.
Të gjitha degët dhe agjencitë e NBG do të bëhen degë të ABI Bank, sipas planit strategjik për zgjerimin dhe shpërndarjen që do tëvendoset nga Abi Bank. Për marrëdhënien me punonjësit, parashikohet që afatet dhe kushtet e parashikuara nga kontratat e punës dhe rregulloret e brendshme do të zbatohen për të gjithë punonjësit e NBG. “Administrimi do të bëjë përpjekjet për të unifikuar, sa më shpejt që të jetë e mundur, afatet dhe kushtet e kontratave të punës për të gjithë personelin e Shoqërisë përthithëse pas Bashkimit”, thuhet në projekt-marrëveshjen e bashkimit.
Sipas të dhënave nga Shoqata e Bankave, në fund të muajit qershor, Abi Bank kishte 18 degë dhe 244 punonjës, ndërsa NBG kishte 26 degë dhe 273 punonjës.
Numri i bankave ulet nga 16 në 14
Krahas përthithjes së NBG nga Abi Bank, Veneto Bank po integrohet si pjesë e Intesa SanPaolo Bank, proces që pritet të përfundojë në shtator.
Kjo do të bëje që numri i bankave të ulet në 14, nga 16 që është aktualisht. Krahas këtyre bashkimeve, sistemi bankar është në një proces intensiv shit-blerjesh dhe ndryshimi pronësie.
Societe Generale Albania, banka e pestë më e madhe në sistemin bankar shqiptar, është drejt finalizimit të shitjes te banka hungareze OTP, në kuadër të një marrëveshjeje më të gjerë për shitjen e degëve të grupit francez Societe Generale në gjithë rajonin.
Banka e Pireut në Greqi ka njoftuar zyrtarisht pak ditë më parë se ka hyrë në një marrëveshje me Grupin Balfin dhe Komercijalna Banka, për shitjen e aksioneve të degës së saj në Shqipëri, Tirana Bank. Shuma totale në konsideratë arrin në 57.3 milionë euro për 98.83% të aksioneve të Bankës Piraeus në Tirana Bank.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
