Bilancet e kompanive, trajnohen 1200 ekspertë kontabël

Cilësia e pasqyrave financiare të sipërmarrjeve në vend lë shumë për të dëshiruar.

Fakti është theksuar nga zëvendësministri i Financave, Elton Haxhi, gjatë aktivitetit për certifikimin që siguruan shumë ekspertë kontabël. Sipas Haxhit, “bilancet kanë mangësi, në veçanti tek informacioni që jepet në shënimet shpjeguese, të cilat janë të domosdoshme për t’i bërë pasqyrat financiare më të qarta dhe transparente për përdoruesit”.

Dihet që një raportim cilësor dhe transparent i financave të kompanisë rrit besueshmërinë e saj e njëkohësisht edhe mundësinë e financimit. Në këtë mënyrë kompanitë mund krijojnë themelet për një rritje të qëndrueshme.

Lexoni edhe : Pse ngritja e një kompanie që e duam përgjithmonë dhe ngritja e kompanisë që duam ta shesim janë e njëjta gjë

Gjatë takimit të zhvilluar në Tiranë me dhjetëra ekspertë financash, eksperti i Korporatës Financiare Ndërkombëtare, Keler Gjika, tha se, “cilësia e raportimit financiar është faktor i rëndësishëm në rritjen ekonomike.

Me mbështetjen e Bankës Botërore dhe Departamentit të Çështjeve Ekonomike të Qeverisë së Zvicrës, Këshilli Kombëtar i Kontabilitetit ka organizuar një program trajnimi për standardet kombëtare dhe ndërkombëtare të kontabilitetit dhe Raportimit Financiar. Programi u përmbyll me trajnimin e 1200 profesionistë kontabël.

Kjo sipas zëvendësministrit të Financave, pritet të rrisë cilësinë e bilanceve të mbajtura nga kompanitë, duke krijuar një bazë të shëndetshme për to dhe për ekonominë private të vendit.