Lila Canaj, Drejtore e Retail në Tirana Bank, ndan vizionin e saj për balancën mes teknologjisë dhe besimit njerëzor, si dhe rolin e Shqipërisë në ekosistemin financiar rajonal.
Në prag të konferencës INFINTECH 2025, Lila Canaj ndan vizionin e saj mbi evolucionin e bankimit në Shqipëri dhe rajon. Me mbi dy dekada përvojë në Retail, ajo po përjeton nga afër një periudhë ku teknologjia po transformon rrënjësisht marrëdhënien mes bankës dhe klientit. Por mes aplikacioneve dhe platformave të reja ajo beson se banking nuk duhet të humbasë “zemrën njerëzore”.
Cili është trendi më i madh në bankimin retail në vitin 2025?
Sot, bankingu nuk është më “online vs. offline”, është simbiotik. Aplikacionet, pagesat pa kontakt dhe kredidhënia dixhitale janë tashmë standard i domosdoshëm. Ajo që e veçon Shqipërinë dhe Ballkanin është dimensioni njerëzor: klientët tanë duan shpejtësinë e teknologjisë, por edhe sigurinë e një bankieri që i njeh, i kupton dhe i jep zgjidhje aspiratave të tyre. Kjo na çon tek koncepti i bankingut hibrid; teknologjia ofron efikasitet dhe shpejtësi, ndërsa kontakti njerëzor ofron besimin. Vetëm kombinimi i këtyre dy elementeve krijon një përvojë që nuk është thjesht funksionale, por thellësisht emocionale.
Bindja ime është se njerëzit nuk marrin vendime thjesht me arsye, por veprojnë kryesisht me emocion. Me këtë në mendje, ne u ofrojmë klientëve tanë jo vetëm shpejtësi dhe komoditet, por edhe atë ndjesi sigurie, qetësie dhe kënaqësie që i bën të ndiejnë se banka është partneri i tyre i besuar. Qoftë kur miratojmë një kredi në 20 minuta, apo kur thjeshtojmë një proces të lodhshëm të përditshëm, vlera që mbetet nuk është zgjighja teknike, por ndjesia emocionale. Në këtë kontekst, suksesi i një banke matet me sa mirë arrin të integrojë AI, analiza të të dhënave dhe automatizim, duke ruajtur njëkohësisht empatinë, lidhjen njerëzore dhe aftësinë për të gjeneruar emocion pozitiv në çdo ndërveprim.
Shumë banka po e ndjekin qasjen “digital first”. Cili është sekreti i suksesit të Tirana Bank?
Suksesi ynë nis nga një e vërtetë e thjeshtë: “digital first” nuk do të thotë “human last”. Strategjia jonë është e bazuar mbi tri shtylla:
-
- Platforma intuitive: nëse një aplikacion ka nevojë për manual përdorimi, nuk është i duhuri. Ndaj, aplikacionet tona krijohen për t’u përdorur natyrshëm dhe pa pengesa.
- Shërbim i personalizuar: Ekipe të përgatitura që ofrojnë këshillim financiar dhe zgjidhje reale. Objektivi ynë është të garantojmë të njëjtën cilësi shërbimi në çdo pikë kontakti – online apo fizikisht – duke siguruar një përvojë cilësore dhe të kënaqshme.
- Inovacion me empati: Çdo produkt/sistem i ri duhet të kalojë vetëm një test: A ja lehtëson jetën klientit?
Rezultati? Hapja e llogarise pa u paraqitur fizikisht në degë, Sistemi i Origjinimit të Kredive që sjell miratim brenda 20 minutash dhe një kulturë ku teknologjia është mjeti, ndersa objektivi dhe destinacioni mbetet kënaqësia e klientit. Diferencën e bën filozofia jonë: klienti nuk është një user ID në ekran, por një individ me histori, aspirata dhe emocione. Teknologjia ofron shpejtësinë dhe saktësinë, por vetëm prekja njerëzore e shndërron shërbimin në përvojë. Ky është bankingu i së ardhmes, në fakt, ky është bankingu i së tashmes: teknologjikisht i avancuar, emocionalisht inteligjent, me klientin gjithmonë në qendër.
Çfarë prisni nga INFINTECH 2025?
INFINTECH është një platformë e hapur ku ekspertë nga Ballkani ndajnë mendimet dhe vizionet e tyre për të ardhmen e bankingut dhe financës. Shpesh, diskutimet për inovacion në forume globale lënë në hije sfidat specifike të rajonit tonë. Për mua, INFINTECH është arena ku ne ndajmë përvojën tonë, forcojmë dialogun dhe ndërtojmë partneritete konkrete për të ardhmen. Është vendi ku ide të reja shndërrohen në zgjidhje praktike dhe ku rajoni ynë mund të tregojë potencialin e vet të plotë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto