Banka Botërore publikoi raportin “Lëvizshmëria Ndërkombëtare si Strategji Zhvillimi”, duke propozuar një sistem gjithëpërfshirës migracioni, GlobAL, që i sheh emigrantët si një forcë pune globale për vendet e origjinës, duke përfshirë Shqipërinë. Raporti nënvizon se emigrantët shqiptarë mund të bëhen motor i zhvillimit ekonomik, duke kontribuar në tregun e punës, në transferimin e aftësive dhe në rritjen e investimeve në vend.
Në këtë kuadër BB rekomandon ndërtimin e sistemeve të integruara të të dhënave mbi emigrantët shqiptarë, duke ndjekur të gjithë ciklin migrator dhe jo vetëm momentet e veçanta. Një sistem i tillë do të lehtësonte menaxhimin e shërbimeve dhe politikave publike, duke shmangur mbledhjen e dyfishtë të informacionit dhe duke ofruar të dhëna të sakta për qeverisjen dhe zhvillimin ekonomik.
Bashkëpunim i koordinuar në nivel vendi dhe rajoni
Raporti sugjeron forcimin e koordinimit ndërinstitucional mes ministrive dhe agjencive shqiptare, si dhe partneritete me sektorin privat, OJF-të, organizatat ndërkombëtare dhe diasporën. Bashkëpunimi me vendet pritëse është thelbësor për të ofruar shërbime gjithëpërfshirëse për emigrantët shqiptarë gjatë gjithë ciklit të migracionit.
Lexo edhe: Rritje e brishtë/ Sektoret tradicionale bien, shërbimet mbajnë në këmbë ekonominë
Banka rekomandon që shërbimet të mbulojnë të gjithë ciklin migrator: përgatitjen para nisjes, qëndrimin jashtë vendit dhe riintegrimin pas kthimit. Paketat e shërbimeve duhet të përshtaten sipas aftësive, përbërjes familjare dhe qëllimeve të emigrantëve, duke maksimizuar ndikimin e tyre në ekonominë vendase.
Po ashtu raporti sugjeron konsolidimin e të gjitha shërbimeve dhe procedurave në një portal të vetëm dixhital, si e-Albania, me standardizim të aplikimeve dhe dokumentacionit. Autentifikimi online, udhëzimet me inteligjencë artificiale dhe qasja “dixhitale së pari” do të thjeshtojnë proceset për emigrantët shqiptarë, duke ruajtur edhe mundësitë për shërbime fizike.
Banka nënvizon nevojën për staf të trajnuar dhe të mjaftueshëm në të gjitha pikat e ofrimit të shërbimeve për emigrantët shqiptarë. Investimet në programe trajnimi dhe anketa mbi emigrantët mund të rrisin eficiencën e shërbimeve, të zvogëlojnë paragjykimet dhe të rrisin mundësitë për punësim dhe integrim më të mirë në vend dhe jashtë tij.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
