Avokati i Popullit, Igli Totozani ngre shqetësime serioze për ashpërsimin e penaliteteve për biznesin. Ai ndërhyn për rishikimin e neneve që parashikojnë burg pranë Komsionit të Ligjeve përmes një shkrese zyrtare.
Kjo lëvizje vjen pas konstatimeve në terren se masat e qeverisë kanë prekur shtresat vunerabël që biznesin kanë të vetmen mënyrë jetese.
Avokati i Popullit sugjeron që aksioni të shoqërohet me politika sociale dhe hapjen e vendeve të reja të punës, pasi penalitetet e parashikuara në kodin penal mund të rezultojnë fatale për këto shtresa në nevojë.
“Është një nismë që duhet diskutuar shoqëruar edhe me masa e politika të tjera, pasi ndryshe do të ishte e nxituar dhe e parakohshme. Kjo pasi në vlerësimin tonë shteti duhet të ketë si kryefjalë të tijën jo vetëm ashpërsimin e politikës penale, por edhe identifikimin dhe zbatimin e politikave sociale, pasi në të kundërtën rrezikohet të krijohen situata ekonomike shumë të vështira për kategori të caktuara shtetasish.
Në konsideratën tonë ky është një ashpërsim i panevojshëm duke mos i lënë asnjë mundësi gjykatës që në bazë të provave, rrezikshmërisë dhe dëmit të sjellë, të ketë mundësinë e zgjedhjes ndërmjet vendosjes së një gjobe, apo burgimit (në rastet me rrezikshmëri të lartë)”, u shpreh Avokati i Popullit.
Avokati i Popullit gjithashtu kërkon rishikim edhe për nenin 15 të projektligjit, ku parashikohet dënim deri në 7 vjet për tatimorët që abuzojnë, duke hequr dënimin me gjobë.
“Gjithashtu heqja e dënimit me gjobë për këtë vepër penale, në vlerësimin tonë nuk është në harmoni me arsyet e përmendura më sipër, si dhe nuk ka një përshkallëzim të dënimit në proporcion me dëmin e shkaktuar. Me përfshirjen e këtyre dispozitave si vepra penale, nesër mund të gjendemi përpara faktit se një numër i lartë personash të varfër dhe që i përkasin grupeve vulnerabël do të gjenden në burgje, për të paguar dënimin e tyre për moslëshim fature tatimore apo mosdeklarim të punësuarish”, tha Totozani.
Avokati i Popullit është institucioni i dytë pas Bankës Botërore, i cili ka apeluar për krijimin e programeve të veçanta për grupet vunerabël. “Duhet menduar paralelisht edhe ana sociale, hapja e vendeve të punës dhe rritja ekonomike. Nga ankesat që kemi administruar në institucionin tonë gjatë këtij, ku veprimet kundra informalitetit janë rritur, kemi evidentuar që një pjesë e mirë e personave që kryejnë veprimtari tregtare janë shtresa në nevojë”, përfundoi Totozani. Propozimet Avokati i Popullit ja ka dërguar Komisionit të Ligjeve, të cilit i kërkon të ndërhyjë për të parandaluar miratimin e masave radikale që burgosin biznesin.
/Sot News/
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
