Australia ka siguruar qasjen ndaj një vaksine premtuese kundër COVID-19 dhe thotë se do të jetë në gjendje të shpërndajë doza falas për të gjithë popullatën e saj prej 25 milionë banorësh. Kjo marrëveshje do ti kushtojë qeverisë miliarda dollarë, por qytetarët do ta përfitojnë vaksinën falas.
Vaksina në fjalë është ajo që po zhvillohet nga kompania farmaceutike AstraZeneca dhe Universiteti i Oxford-it.
AstraZeneca në partneritet me Universitetin e Oksfordit, ka nisur fazën e tretë të testimit klinik, në të cilin po marrin pjesë mijëra njerëz. Kompania ka arritur tashmë marrëveshje me disa qeveri dhe organizata për të prodhuar të paktën 3 miliardë doza të vaksinës, dhe dërgesat e para do të fillojnë nga muaji shtator.
Lexoni: Pas Rusisë edhe Kina prezanton vaksinën kundër COVID-19
Në një fazë të mëvonshme do të përcaktohen më shumë detaje konkrete si çmimi dhe shpërndarja. “Nëse testet klinike rezultojnë të suksesshme, atëherë marrëveshja me AstraZeneca do të na garantojë akses të hershëm për çdo australian”, deklaroi kryeministri Scott Morrison.
Sipas tij, vaksinimi me shumë gjasë ka për të qenë i detyrueshëm. Australia ka shënuar 450 vdekje nga koronavirusi, shumica e tyre pasojë e një shpërthimi të vrullshëm të sëmundjes në shtetin e Viktorias, i cili në fillim të këtij muaji shpalli gjendjen e jashtëzakonshme dhe vendosi masa të rrepta izolimi pas një shtimi të menjëhershëm të infektimeve.
Viktoria ka ende më shumë së 7.000 raste aktive, por numri i të prekurve të rinj ka pësuar rënie javën e kaluar. Vaksina e Oxford dhe AstraZeneca është një prej pesë kandidateve premtuese për të mbërritur fazën më të avancuar të testeve klinike dhe shumë vende të botës po përpiqen ta sigurojnë për popullatat e tyre.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
