Katër ditë pas dorëheqjes së Mirlinda Karçanajt, kryeministri Edi Rama prezantoi në krye të AKSHI-t drejtorin e ri, Igli Tafa, duke i lënë porosinë e qartë: për të çuar para vizonin për modernizmin dhe digjitalizimin e të gjitha shërbimeve.
Lexo edhe:Kush është Igli Tafa, njeriu i sigurisë kibernetike që merr drejtimin e AKSHI-t?
“Jetojmë në një fazë të historisë, ku po ndodh një tjetër revolucion, si ai revolucioni që ju bëni çdo ditë për të transformuar Shqipërinë në shëmbëlltyrë të botës së re dixhitale. Po ndodh edhe një tjetër revolucion, më i egër, më i dhimbshëm, me më shumë plagë me më shumë brutalitet, por i domosdoshëm, revolucioni i transformimit të sistemit të drejtësisë nga një kalbësirë e gjallë, në një sistem drejtësie të drejtë, të barabartë dhe funksional. Jemi larg prej kësaj të fundit, por rruga është pakthim, dhe për fat të keq, nëse në botën tuaj virtuale eksperimente bëhen me algoritme, nëse në botën tuaj virtuale dështimet janë ngecje, fikje të programit, në këtë botën e drejtësisë, këto bëhen mbi lëkurën e njerëzve. Nuk është një kompjuter që fiket, është një jetë njeriu që vendoset në pozitë aspak të admirueshme dhe aspak për tu pasur zili”, vijoi Rama.
Kryeministri njoftoi edhe një tjetër partneritet të rëndësishëm, atë me kompaninë teknologjike Nvidia, e cila do të suportojë qeverinë shqiptare në infrastrukturën e nevojshme për operimin e Diellës. “Nvidia është e gatshme të bëhet partnere me ne për Diellën. Kemi sfida të tjera, sic janë prokurimet me inteligjencën artificiale. Do të jetë model. Aleanca jonë me Microsoft e jashtëzakonshme. “, tha kryeministri.
Krah ministres Delina Ibrahimaj, Kryeministri Rama premtoi paga më të larta për punonjësit e AKSHI-t, në një kohë kur konkurrenca nga privati në këtë sektor është tepër e lartë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
