Ministri i Ekonomisë, Arben Ahmetaj ka pritur pasditen e kësaj të mërkure në një takim ministrin e Jashtëm austriak, Sebastian Kurz, me të cilin ka nënshkruar një marrëveshje bashkëpunimi në fushën e turizmit.
Sipas një njoftimi për shtyp të Ministrisë së Ekonomisë, marrëveshja parashikon angazhimin e të dyja palëve për bashkëpunim në një sërë aspektesh të turizmit.
Kështu, mes dy vendeve do të ketë:
Shkëmbim të informacioneve reciproke mbi turizmin, si statistika, akte ligjore e rregullore;
Shkëmbim i njohurive dhe kurseve të trajnimit; i ekspertizave për zhvillimin e skemave të financimit të turizmit;
Inkurajime për investime; si dhe bashkëpunim mes operatorëve të sektorit.
Dy ministrat janë angazhuar gjithashtu për organizimin e takimeve bilaterale të ekspertëve të fushës për tema specifike si turizmi kulturor, turizmi dimëror, ai kulinar, etj.
Sa i takon marrëdhënieve ekonomike e tregtare me Austrinë, vijon njoftimi, në vitin 2014 volumi tregtar mes dy vendeve shënoi një rritje prej 12.5%, eksportet u rritën me 56% dhe importet me 3.6% krahasuar me vitin 2013.
Gjithashtu, investimet e huaja direkte nga Austria në vitin 2014 përbënin 8% të totalit të FDI në vend, duke e renditur Austrinë në vendin e 6 për investimet direkte në Shqipëri.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
