Le të bëjmë një ushtrim të vogël mendimi: Supozoni se Universiteti i Harvardit, Fondacioni Carnegie dhe Qendra Kërkimore Stanford bashkohen për të zbuluar se çfarë e bën një person të suksesshëm në punë. Supozoni se ata zbulojnë se ekzistojnë dy grupe të veçanta aftësish. Njëri grup përbën rreth 15% të suksesit në punë, ndërsa tjetri 85%. Cilat aftësi do të quheshin më të rëndësishme?
Duket si një pyetje e thjeshtë, por nuk është. Ky kërkim ekziston dhe vazhdon të tregohet se aftësitë më pak të rëndësishme ende quhen “aftësi të forta.” Këto përfshijnë njohuritë teknike dhe zotërimin e mjeteve që përdoren në punë. Grupi tjetër, që ka më shumë rëndësi, shpesh quhet “aftësi të buta” – ndonjëherë në mënyrë nënvlerësuese. Shpesh në evente teknologjike lavdërohen aftësitë e kodimit, por rrallëherë përmendet aftësia për të komunikuar apo për inteligjencën emocionale.
Kjo është më shumë se sa një shqetësim hipotetik – është një problem real. Për aq kohë sa këto aftësi të rëndësishme vazhdojnë të quhen “të buta”, ato do të nënvlerësohen. Duhet të lihen mënjanë këto terma dhe këto aftësi të quhen thjesht “aftësi” pa asnjë emërtim shtesë.
Cilat janë atëherë elementët kryesorë që duhen vlerësuar te një kandidat i suksesshëm pune? Janë pesë pika thelbësore:
1. Përvoja është më e vlefshme se njohuritë teorike
Për të kuptuar këtë pikë, imagjinoni dy negociatorë pengjesh. Njëri është një student brilant i sapodiplomuar në akademinë e policisë, ndërsa tjetri ka 22 vite përvojë në këtë fushë. Kur situata bëhet e vështirë dhe çdo vendim ka pasoja të mëdha, do të preferonit dikë që ka kaluar përvoja të tilla më parë, di çfarë të presë dhe mund të menaxhojë stresin.
2. Diploma nuk është gjithçka – kompetenca është çelësi
Një diplomë universitare tregon se dikush ka zotëruar disa aftësi teknike, por nuk garanton domosdoshmërisht aftësi të tilla si fleksibiliteti apo aftësia për të menaxhuar sfida të reja. Shumë menaxherë po kuptojnë se diploma nuk është gjithmonë treguesi më i mirë për aftësitë reale që kërkohen në një ambient pune të përditshëm. Ajo që ka më shumë rëndësi është aftësia për të përballuar situata kritike dhe për të komunikuar efektivisht me të tjerët.
3. Matja e sjelljeve është më e rëndësishme sesa duket
Ndonjëherë aftësitë e buta duken si cilësi të paprekshme, por janë thelbësore për suksesin e punonjësve. Matja e sjelljeve të caktuara, si aftësia për të menaxhuar kohën apo për të bashkëpunuar në ekip, mund të bëjë diferencën në një rekrutim të suksesshëm. Menaxherët duhet të krijojnë mënyra për të matur këto sjellje, ashtu siç bëjnë për aftësitë teknike.
4. Mendimi logjik është një vlerë thelbësore
Një pyetje që lidhet me mendimin logjik mund të zbulojë më shumë rreth aftësive të një personi sesa njohuritë teknike. Një inxhinier mund të habitet kur pyetet sa monedha do të duhej për të arritur lartësinë e një ndërtese të madhe, por qëllimi i intervistuesit nuk është përgjigja e saktë, por mënyra se si mendon dhe zgjidh problemin.
5. Aftësitë e buta mund të zhvillohen
Ka një keqkuptim të zakonshëm se aftësitë e buta nuk mund të mësohen. Në fakt, studimet tregojnë se ato jo vetëm që mund të zhvillohen, por edhe të përmirësohen me kalimin e kohës. Megjithatë, ndryshe nga aftësitë teknike, këto aftësi nuk mund të mësohen vetëm me trajnime apo libra. Duhet që kompanitë të ofrojnë mundësi praktike për punonjësit që t’i zhvillojnë këto aftësi, përmes projekteve të ndryshme dhe ndërveprimeve të përditshme.
Është koha të ndalojmë së foluri për “aftësitë e buta” dhe të përqendrohemi te zhvillimi dhe vlerësimi i aftësive që vërtet ndikojnë në suksesin e dikujt në një vend pune që bëhet gjithnjë e më kompleks dhe dinamik.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
