Administrata Trump prezantoi zyrtarisht udhëzimet e reja ushqimore për amerikanët, duke sjellë një ndryshim të fortë filozofie në mënyrën se si duhet të ushqehet popullata. Sipas Shtëpisë së Bardhë, piramida ushqimore “po kthehet përmbys”, me theks të fortë te proteinat cilësore dhe yndyrnat e shëndetshme, ndërsa sheqeri dhe ushqimet shumë të përpunuara dekurajohen hapur.
Udhëzimet e reja u prezantuan në një konferencë për shtyp nga Sekretari i Shëndetësisë Robert F. Kennedy Jr. dhe Sekretarja e Bujqësisë Brooke Rollins, të cilët theksuan se ky hap synon të redukojë sëmundjet kronike dhe kostot shëndetësore në SHBA.
“Po i japim fund luftës kundër yndyrnave të ngopura,” deklaroi Kennedy, duke theksuar se produkte si djathi, gjalpi, mishi, vezët dhe bulmeti janë keqinterpretuar për dekada.
Sipas udhëzimeve të reja, dieta duhet të bazohet te:
-
Proteina cilësore (mish, shpendë, peshk, bishtajore)
-
Yndyrna natyrale nga vezët dhe bulmeti
-
Perime dhe fruta të freskëta
-
Drithëra integrale të pasura me fibra
Ndërkohë, buka e bardhë, pijet me sheqer, ushqimet e shpejta dhe produktet e gatshme konsiderohen faktorë që dëmtojnë shëndetin dhe duhet të shmangen.
Një nga qëllimet kryesore të këtij “modeli të ushqimit të plotë” është ulja e obezitetit, diabetit të tipit 2 dhe sëmundjeve kardiovaskulare, të cilat aktualisht i kushtojnë taksapaguesve amerikanë rreth 600 miliardë dollarë në vit.
Udhëzimet e reja do të ndikojnë drejtpërdrejt në miliona vakte ditore, përfshirë ushqimin në shkolla publike, baza ushtarake, burgje dhe institucione federale.
Shoqata Amerikane e Mjekëve (AMA) e përshëndeti vendimin, duke e cilësuar si një hap të rëndësishëm drejt idesë se “ushqimi është ilaç” dhe një mjet kyç për parandalimin e sëmundjeve kronike.
Administrata Trump e cilëson këtë ndryshim si një revolucion ushqimor, që synon të transformojë kulturën ushqimore amerikane dhe të rikthejë shëndetin e popullatës.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
