Duke qenë drejtuesi i një skuadre të tërë, ju ndjeni detyrimin që të jeni të qartë me stafin tuaj. Por, fakti që mund të flisni shumë, jo domosdoshmërisht mund të pritet mirë nga të tjerët.
Çdo shef ka dëshirë të dëgjohen dhe respektohen të gjitha frazat që ai flet. Zbatimi i këtyre të fundit më përpikmëri, shmang konfliktet në punë dhe siguron produktivitet. Çdo shef mundohet që gjithmonë t’i thotë gjërat në mënyra të ndryshme, me qëllim që të mos bëhet monoton. Kjo nuk ndodh vetëm me stafe të mëdha. Edhe kur stafi është i vogël këto këshilla vlejnë.
Por, në një moment të caktuar, një shef i bën një pyetje vetes së tij: A jam duke folur shumë? Kur është koha për një pauzë? Sipas disa studimeve të Harvardit rezulton se “komunikimi i vazhdueshëm dhe i panevojshëm” nga ana e drejtuesve, ndihmon në realizimin me shpejtësi të projekteve. Komunikimi me stafin tuaj ju ndihmon për të kapërcyer pengesat, që do të hasni gjatë rrugëtimit.
Lexo: Dëshironi të jeni një shef i madh? 7 gjërat që duhet t’i bëni çdo ditë
Orientohuni në dy drejtime
Kur po përpiqeni të komunikoni vizionin tuaj dhe të organizoni punën që ju pret, së pari ju duhet të flisni. Ju keni shumë për të thënë, kaq shumë mendime në kokën tuaj. Dhe duke qenë se jeni “shefi”, pjesëtarët e tjerë të ekipit mund të ndiejnë detyrimin për t’ju dëgjuar. Ju mund të humbni edhe sensin e kohës.
“Drejtuesit efikasë jo vetëm flasim, por dëgjojnë”, sipas përfundimeve të Northeastern University. Ndërkohë që zhvilloni takime, jini të kujdesshëm të vëreni se sa kohë kaloni duke folur dhe sa kohë duke dëgjuar. Dhe kur merrni një përgjigje, ndonjëherë kërkojuni edhe pjesëtarëve të tjerë të ekipit të vlerësojnë përgjigjen. Në këtë mënyrë, çdokush është i përfshirë dhe do të ndiejë se kontributi i tij është vlerësuar.
Mos e ndërprisni kurrë “procesin”
Kur punonjësit tuaj janë të angazhuar për të gjetur një zgjidhje apo për të përmbushur detyrat që u janë ngarkuar, nuk është momenti i duhur për të nisur një diskutim me ta. Vetëm në rastin e diçkaje urgjente, nuk duhet t’i ndërprisni kurrë ata në procesin e tyre, në të cilin janë përqendruar për të përmbushur punët e rëndësishme. Ju duhet të siguroheni që ata të kenë periudha të mjaftueshme, gjatë të cilave të mos ndërpriten, në mënyrë që të gjejnë përqëndrimin. Ndërprerja e ditës së punës me mbledhje është një mënyrë e sigurt për të vrarë produktivitetin në çdo mjedis pune krijues.
Kjo është arsyeja, si rregull, që koha ideale për diskutime apo për një mbledhje është në fillim të ditës së punës ose në fund të saj. Ia vlen të diskutoni në këto intervale vetëm atëherë kur ata që kanë nevojë janë të disponueshëm në të njëjtën kohë.
Bëni takime çdo muaj
Për t’u siguruar që idetë dhe shqetësimet janë marrë në konsideratë, çdo pjesëtar i ekipit duhet të ketë një takim individual me drejtuesit një herë në muaj. Në këto takime, anëtarët e ekipit mund të thonë çdo gjë. Kërkojuni punonjësve tuaj të shfaqin në takim edhe ndonjë problem. Ai mund të jetë një shqetësim rreth një produkti që janë duke krijuar apo mënyrën se si vepron kompania. Po ashtu, janë të mirëpritura edhe idetë e reja që lidhen me përmirësimin. Ju duhet t’i nxisni punonjësit tuaj të sjellin edhe çështje pozitive, gjëra për të cilat janë entuziastë dhe gjëra të cilat dëshirojnë të mos i bëjnë më.
Përtej politikës së dyerve të hapura
Liderët dhe menaxherët e kompanive duhet të presin çdo pjesëtar të ekipit për të diskutuar çështje të mëdha apo të vogla. Por siç shkruajnë ekspertët, të thuash se zbatoni një politikë të dyerve të hapura, nuk është e mjaftueshme. Është e rëndësishme që t’u jepni mundësinë punonjësve të flasin, duke u treguar atyre se ju do të veproni kur ata shfaqin shqetësimet e tyre.
Lexo: Si t’i kërkoni shefit tuaj pushime shtesë pas një udhëtimi pune
Një mënyrë për ta arritur këtë objektiv është nëpërmjet “ciklit të feedback-ut”. Pas ngritjes së një shqetësimi, në një mbledhje në grup apo në një takim kokë më kokë, ju duhet ta ndiqni atë. Monitoroni progresin, identifikoni pengesat dhe vijoni përpjekjet. Sa më shumë ta bëni këtë gjë, njerëzit do të shohin vlerën praktike të ngritjes së një shqetësimi – dhe të shohin se çfarë mund të arrijë diskutimi në të cilin ju angazhoheni.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
