Me organizim të Innovation Centre Kosovo (ICK) dhe nën patronazhin e Ambasadorit Amerikan në Kosovë, Greg Delawie, sot hapet Java Globale e Sipërmarrjes, njëkohësisht në 165 shtete të botës. Java Globale e Sipërmarrjes është ngjarja më e madhe festive e sipërmarrjes në botë, e cila bën bashkë sipërmarrës, inovatorë, punëdhënës dhe aktorë tjerë, që për qëllim kanë zhvillimin e ideve të reja, krijimin e vendeve të reja të punës, rritjen e mirëqenies dhe zhvillimin ekonomik.
Përgjatë një jave në muajin nëntor, GEW promovon sipërmarrjen nëpërmjet aktiviteteve lokale nëpër shtete të ndryshme, të dizejnuara për të vënë në pah potencialin e sipërmarrësve të rinj dhe inovatorëve. Aktivitetet variojnë nga garat, takimet kokë më kokë, prezantimet, trajnimet profesionale, rrjetëzimet, mentorimet, aktivitetet sociale dhe ligjëratat nga mysafirë të mirënjohur të fushës.
GEW është më shumë sesa një fushatë vetëdijësuese. GEW është platformë për ndërlidhje dhe bashkëpunim ndër shtetëror, me qëllim të forcimit të ekosistemit botëror në fushën e sipërmarrjes. Në vitit 2015, në mbarë botën janë regjistruar 30,000 aktivitete, me më shumë se 10 milionë pjesëmarrës të drejtpërdrejtë.
E gjitha ka filluar nga ideja që njerëz nga mbarë bota të zbulojnë talentin dhe të fillojnë rrugëtimin si sipërmarrës. Më 2007 përfaqësues nga 37 shtete, udhëhequr nga Jonathan Ortmans (President i GEW), e shpallën të hapur fushatën globale, e cila në fillimet e saj u mbështet nga Carl Schramm (ish CEO në Kauffman Foundation) dhe Gordon Brown (ish-kryeministër i Britanisë së Madhe).
Që nga Qershori i vitit 2013, Innovation Centre Kosovo është partner zyrtar i GEW për Republikën e Kosovës. Qëllimi i GEW Kosova është motivimi i të rinjëve për të konsideruar sipërmarrjen si rrugën e tyre të së ardhmes. GEW Global dhe GEW Kosova punojnë bashkë në krijimin e rrjetit të organizatave partnere dhe komunitetit të liderëve lokalë, si promotorë të përhershëm të vlerave të GEW, përgjatë tërë kohës.
GEW po ashtu shërben si platformë për lidhjen e sipërmarrësve të rinj dhe inovatorëve të Kosovës me sipërmarrës, partnerë, investitorë dhe klientë nga të gjitha shtetet pjesëmarrëse.
Më 2014, për herë të parë, GEW Kosova u organizua nën patronazhin e ish-Presidentes së Republikës, Atifete Jahjaga.
Gjatë Kongresit Global të Sipërmarrjes, të mbajtur në Medellin e Kolumbisë, në Janar të vitit 2016, Kosova fitoi çmimin “Brand & Community Champions”, si rezultat i përpjekjeve të përbashkëta dhe organizimit të mirëfilltë të komunitetit dhe fushatës promovuese të GEW 2015. GEW 2016 mbështetet nga Ambasada e Suedisë, Ambasada e SHBA-ve dhe USAID.
Për më shumë informacione klikoni Këtu.
burimi: Telegraf
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
