Konfindustria: të hiqen masat shtrënguese. Nevojitet qarkullimi i lirë Shqipëri-Kosovë

Konfindustria mbështet fillimin e lehtësimit të masave shtrënguese kundër Covid 19 për një kategori biznesesh të shërbimeve, por është kundër hyrjes në fuqi në datën 11 Maj, duke kërkuar zbatim të menjëhershëm. Përmes një njoftimi për shtyp, Konfindustria ka kërkuar të zgjerohet  kategoria e bizneseve të lejuara, kundrejt protokolleve ligjore të sigurisë shëndetësore. Në hapsirat e vendit, ku nuk ka raste të prekjes nga epidemia, gjendja duhet të shkojë menjëherë drejt normalitetit të plotë pa kufizime.

Konfindustria vlerëson, se sidomos është e rëndësishme të lehtësohet qarkullimi i qytetarëve, zgjerimi i dukshëm i hapsirave orare të lëvizjes ditore dhe lejimit të transportit, sipas praktikave të vendeve të tjera të Rajonit. Transporti me mjete private duhet të lirohet tërësisht si brenda bashkive ashtu edhe në të gjithë hapsirën gjeografike të vendit. Nuk ka asnjë kuptim dhe vlerë, sipas saj, lejimi i aktiviteteve të shërbimeve si p.sh hoteleve, etj., nëse nuk shoqërohet me lejimin e qarkullimit të qytetarëve.

Lexo: Konfindustria propozon masa përmirësuese për bizneset

Konfindustria kërkon, që qeveritë e Shqipërisë dhe Kosovës, të krijojnë sa më shpejt një zonë të përbashkët të lirisë së qarkullimit të qytetarëve në periudhën e mbylljes ndërkombëtare të pandemisë.

Të dhënat shëndetësore tregojnë, që shkalla e rrezikut të Covid 19 në Shqipëri, Kosovë dhe në Rajon, është shumë e ulët në shkallë krahasimore me vendet historike të BE. Ndërkohë, masat shtrënguese në Shqipëri janë tërësisht jopërpjestimore me shkallën e rrezikut shëndetësor dhe mjaft më të ashpra, sesa vendet e Rajonit dhe më tej. Deri tani masat shtrënguese kanë prodhuar një faturë financiare me mbi 2 miliard dollarë në ekonominë kombëtare, me pasoja të rënda për biznesin, qytetarët, shtimin e papunësisë dhe buxhetin e shtetit.