Parlamenti Europian hap dyert për të pastrehët dhe të prekurit nga COVID-19

Në Bashkimin Europian politika tani po bëhet përmes internetit, duke i lënë ndërtesat e Brukselit të boshatisura. 

Kjo do të thotë se zyrat e Parlamentit Europian mund të përdoren në shërbim të luftës kundër koronavirusit.

“Ne kemi vendosur ta kthejmë një nga ndërtesat tona në strehë për njerëzit, të cilët nuk kanë një shtëpi dhe për shoqërinë më të prekur gjatë kësaj urgjence të rëndë shëndetësore”, tha Presidenti i Parlamentit Europian, David Sassoli, përmes një videomesazhi.

Në Bruksel, brenda njërës prej ndërtesave do të krijohen dy hapësira. Një për të pastrehët dhe një për ata, që dalin nga spitali, por nuk mund të kthehen në shtëpi.

Kuzhinat do të jenë gjithashtu në dispozicion të plotë.

“Çdo ditë, kuzhinat tona do të përgatisin 1,000 vakte për t’i shpërndarë mes personave që kanë nevojë si edhe për punonjësit e shëndetësisë, për t’i ndihmuar ata gjatë orarit të punës. Ne u qëndrojmë pranë të gjithë personave që po vuajnë dhe atyre që në mënyrë të palodhur po punojnë në spitalet tona”, shtoi Sassoli.

Në qytetin francez të Strasburgut, një tjetër ndërtesë e Parlamentit Europian do të pranojë pacientë.

“Në javën e ardhshme, do të ketë një qendër pikasje”, shpjegon zëdhënësi i parlamentit Jaume Duch, “sepse të gjithë e kanë kuptuar se faza e daljes nga kjo pandemi do të ketë të bëjë me aftësinë për të testuar një numër të madh njerëzish dhe për të izoluar ata që e kanë këtë sëmundje edhe në rast se nuk shfaqin simptoma”.

Që në mes të marsit, europarlamentarët dhe zyrtarët e Parlamentit Europian e kanë transferuar punën e tyre në shtëpi, duke mbajtur takime e madje edhe duke votuar mënyrat e përballimit të kësaj krize.

euronews