Mes zakoneve, parimeve, bindjeve, traditës familjare e karakterit personal, figura e sipërmarrësit të suksesshëm po dizenjohet gjithnjë e më e ngjashme.
Shumë studime tregojnë se si ata e organizojnë ditën, kohën e lirë, me çfarë ushqehen, sa rëndësi i japin familjes dhe punës, ku besojnë më shumë. Mes këtyre studimeve Businessmag sjell disa prej karakteristikave të përbashkëta të tyre që kanë përcaktuar suksesin.
Zgjohen herët
Për të përfituar nga orët para fillimit të ditës së punës, njerëzit e suksesshëm zgjohen herët – Richard Branson zgjohet në orën 5 dhe Anna Wintour, kryeredaktore e Vogue, është në fushën e tenisit në orën 5:45. Ata ngrihen në këto orare për të planifikuar ditën e tyre, për t’u ushtruar ose punojnë në projekte personale të tilla si shkrimi i një libri.
Shmangin në takimet e tyre pesimistin
Një studim lidhur me zakonet e përditshme të njerëzve më të pasur, me autor Thomas C. Corley, tregon se njerëzit e suksesshëm shmangin gjithmonë pesimistin.
Corley shkruan, “Milionerët e bërë vetë janë shumë praktikë lidhur me njerëzit që zgjedhin të krijojnë raporte”. “Ti je aq i suksesshëm sa njerëzit me të cilët shpenzon kohë. Të pasurit janë gjithmonë në kërkim të individëve, të cilët janë të orientuar drejt realizimit të qëllimeve, optimistë, entuziastë dhe që kanë një mendësi pozitive”.
Studimi tregon se, 86% e njerëzve të pasur lidhen me njerëz që synojnë suksesin. Në të njëjtën kohë, ata qëndrojnë larg njerëzve negativë dhe toksikë.
I bëjnë zgjidhjet të thjeshta
Thjeshto problemin! E keni dëgjuar këtë? Nuk vlen vetëm në ekuacionet me shumë të panjohura të matematikës. Edhe jeta është një ekuacion me shumë të panjojura. Ndaj para se ta zgjidhni një problem duhet ta thjeshtoni sa më shumë atë, për të shkuar në thelb të problemit. Bill Gates vlerëson zgjidhjet e thjeshta. Në një fjalim të vitit 2007 në Harvard, Gates diskutoi se si kompleksiteti ndikon në rrugën e zgjidhjeve: “Për të vepruar ne duhet të shohim problemin, zgjidhjen dhe më pas impaktin që ka kjo zgjidhje tek problemi, sa më e thjeshtë zgjidhja aq më mirë. Kompleksiteti vetëm sa i ndërlikon gjërat.”
Besojnë se dështimi prodhon sukses
Të gjithë sipërmarrësit e besojnë këtë. Elon Musk i pari, por jo vetëm. Themeluesja e Spanx, Sara Blakely, ishte 29 vjeç kur u bë një milionere. Pas 12 vitesh iu bashkua klubit të miliarderëve (41-vjeç), duke u bërë miliarderja më e re femër.
Dështimi nuk është një fjalë e huaj për të. Ajo beson se dështimi është thelbësor për suksesin, duke thënë për CNBC në vitin 2013: “Babai im na rriti duke na inkurajuar mua dhe vëllain tim që të dështojmë … Na lejoi që të jemi më të lirë në përpjekje për të bërë gjërat dhe na përkrahu gjatë jetës sonë.”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
