Nuk po flasim për xhirot me makina, apo xhirimin e gomave në një garë shpejtësie. Flasim për xhirot e bizneseve: aktivitetin tregtar të tyre, ose me saktë ritmin me te cilin ecin dhe arkëtojnë para sipërmarrjet.
Drejtoria e Tatimeve, në një njoftim të saj zyrtar thekson se Administrata Tatimore ka konstatuar nga monitorimi i vazhdueshëm se ka tatimpagues aktivë që kanë pasur rënie në xhiron e deklaruar në kasat fiskale, krahasuar me periudhat paraardhëse. Ndaj tatimpaguesit duhet të vetëkorrigjojnë raportimet, duke reflektuar aktivitetin real që ushtojnë.
Sipas tatimeve, të gjitha rastet do të kontrollohen përmes thirrjeve në zyrë, vizitave në terren, vizitave fiskale në raste të veçanta, si dhe përmes çdo rruge tjetër komunikimi.
Tatimet kanë konstatuar edhe tatimpagues, të cilët nuk transmetojnë rregullisht shitjet e tyre ditore. Në këtë rast, sipërmarrjet duhet të informojnë tatimet për shkaqet, për të cilat nuk është bërë i mundur transmetimi, si dhe të marrin masa për të rregulluar problemin.
Nëse në vijim, nga ana e tatimpaguesve nuk do të merren masat e nevojshme për përmirësimin e raportimit me kasë fiskale dhe transmetimet ditore të shitjeve, ata do të bëhen objekt i kontrolleve tatimore.
Sipërmarrjet do të njoftohen përmes telefonit nga stafi i Qendrës së Thirrjeve, sipas njoftimit zyrtar të Tatimeve.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
