‘’Përveç punimeve të varkave artizanale ajo që duam të ofrojmë është mundësia e një galerie apo muzeu të gjallë, ku njerëzit të mund të njihen me traditën tonë të detarisë si dhe kulturën detare’’, shprehet Genta për Businessmag.al.
Në punishten e saj modeste njihesh me disa nga punët e përfunduara dhe me varkat që kërkojnë ende kohë e mund të jenë gati për lundrim. Gjysma e ditës e gjen Gentën në punishte, në gjysmën tjetër i takon të punojë diku tjetër në mënyrë që të gjenerojë të ardhura për të investuar në punishte. Nata e gjen Gentën mbi libra e para ekranit të laptop-it duke studiuar lidhur me përmirësimin e teknikave të ndërtimit të varkave.
Duke vënë në punë pasionin dhe profesionin e saj, Genta po punon për të promovuar varkat ekologjike si ato me vela dhe lopata, ndryshe nga praktika e lundrimit të varkave me motorrë e të ndërtuara me material joekologjik. Ajo po negocion me autoritetet e qyteteve bregdetare për të promovuar për fëmijë e të rritur sportin e garave me varka, ku pse jo të vendosë një “flotë” varkash nën kujdesin e profesionistëve për lundrime turistike në det e liqen. Varkat dhe aktivitete të tilla i mungojnë bregdetit tonë.
Përmes muzeut të detarisë, Genta synon të prezantojë, modelet e anijeve që kanë lundruar në Adriatik dhe në botë, sigurisht të punuara nga dora e saj. ‘’Do të ketë një gamë të gjerë të modeleve të prodhuara në Shqipëri gjatë kohës së komunizmit, harta, pjesë të anijeve dhe varkave të vjetra si edhe informacion historik’’. Për këtë projekt ka kontaktuar me një grup arkeologësh të huaj, të cilët pritet ta asistojnë.
“Kjo është rruga që kam zgjedhur dhe nuk do të ndalem paçska vështirësive”, thotë Genta. Në punishten e saj, përulur mbi krijesën e drunjtë ajo punon e kalit me durim projektet e saj, e pamërzitur që jashtë vendit të saj ky profesion do ta bënte të pasur.
Lexoni: Ja cilët do të jenë gjysëmfinalistët e “Do you have an idea?”
Genta ka studiuar në Fakultetin e Inxhinierisë Pyjore, dega Përpunim Druri e specializuar në prodhim varkash në Universitetin Bujqësor të Tiranës. Pas një periudhë të gjatë në Itali, ka zgjedhur të angazhohet në punishten e saj, bashkë me të atin, marangoz. Deri më tani, ajo ka përfunduar e shitur disa varka.
‘’Nga punishtja jonë artizanale gjatë vitit të parë të prodhimit janë krijuar 6 modele varkash druri. Bëhet fjalë për varka për përdorim kryesisht për kënaqësi, me vela, lopata, si dhe me motorr. Aktualisht po punohet mbi projektet dhe të dy modeleve të tjera, për të plotësuar modelet e varkave dhe skafeve klasikë prej druri’’, thotë Genta.
Gjithashtu, thekson se klientëve u jepet dhe mundësia për të realizuar projekte me kërkesa të veçanta. Duke qenë se bëhet fjalë për punime artizanale druri, çmimi i një varke fillon nga 1200 euro. Çmimi varet nga modeli dhe kërkesat ekstra që mund të ketë çdo klient. Punishtja ka shitur disa varka me lopa, me vela si dhe motorskaf klasik. Përgatiti: Marcela Llanaj
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
