Duke folur me investitorët gjatë një udhëtimi në Kinë së bashku me kancelaren gjermane Angela Merkel, Matthias Müller tha se kompania do të tregohet e pamëshirshme në ndëshkimin e atyre të përfshirë në skandalin e emetimeve që i ka shkaktuar një shpërfytyrim imazhit të kompanisë.
Müller bën të ditur një plan prej pesë pikash me premtimin për t’i vendosur konsumatorët e prekur nga skandali në zemër të kompanisë ndërsa kompania do të jetë në kërkim të një mentaliteti dhe kulture të re, raporton The Guardian.
“Nuk do lëmë gur pa lëvizur për të zbuluar atë se çfarë ndodhi dhe për t’u siguruar se një gjë e tillë nuk do të përsëritet më kurrë,” thotë ai. Firma profesionale e auditimit Deloitte është e pajtuar nga VW për të investiguar përgjegjësit.
Müller vazhdon më tutje duke thënë se VW do ketë një riorganizim të madh të strukturës menaxheriale të kompanisë duke vënë më shumë theksin në vendimmarrjen lokale.
Ai ka thënë gjithashtu se një strategji e re do të shpallet gjatë verës së ardhshme, e cila do të shërbejë si harta strategjike e VW-së për 10 vitet e ardhshme deri në vitin 2025. Kjo do të rezultojë në reduktimin e më shumë se 300 modeleve nga portofoli i prodhimit të kompanisë. Për më tepër fokusi i kompanisë do të jetë prodhimi i makinave elektrike.
Pavarësisht humbjeve të deklaruara nga kompania dhe tërheqjes mbrapsht nga tregu të 11 milionë automjeteve për riparimin e tyre, kompania qëndron pozitive pasi shpreson se planet e saj do të rrisin të ardhurat nga shitjet e automobilave me 4% këtë vit.
Katastrofa “Volkswagen” nuk prek vetëm tregjet evropiane dhe amerikane. Rrjeti kabllor indian CNBC-TV18 raporton se VW do të tërheqë edhe 100,000 makina nga tregu indian, pasi e njëjta pajisje e integruar në makinat e tregjeve evropiane dhe amerikane është gjendur edhe në ato të shitura në tregun aziatik.
Pritet që tërheqja e automjeteve të ndodhë para dates 8 Nëntor të këtij viti dhe ka shumë gjasa të prekë ato automjete te të cilat motorrët kanë qenë të importuar. Megjithatë 20,000 mjetet të prodhuara në Indi mund të mos tërhiqen nga tregu.
Lexoni edhe : Volkswagen na “mëson” si ta pësosh
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
