Kuvendi voton buxhetin e 2016-ës

Kuvendi miratoi këtë të enjte me 86 vota pro projekt-buxhetin e vitit 2016 si dhe paketën fiskale që shoqëron atë.

Akciza për birrën që prodhohet në vend, nuk do të rritet siç ishte parashikuar në akcizën për pijet – pjesë e paketës fiskale. Me 81 vota pro është miratuar amendamenti i deputetit të LSI-së Përparim Spahiu për të mos ndryshuar akcizën e birrës.

Diskutimet u shoqëruan me tone të ashpra lidhur me nivelin e investimeve dhe mbështetjen sociale, që opozita e kundështoi ashpër, ndërsa akuzoi qeverinë se ky është buxhet i varfërisë, i cili braktis ekonominë dhe ngrin përfitimet për qytetarët.

Shpenzimet totale parashikohen në masën e 452 125 milionë lekëve, ndërsa të ardhurat planifikohen 417 694 milionë lekë.

Pr/buxheti i 2016-ës ka nivelin më të ulët të defiçitit buxhetor, prej 2.2 për qind e Prodhimit Kombëtar, çka bën të mundur që për herë të parë pas shumë vitesh rritje, Shqipëria të ulë borxhin publik nga 72.6 për qind në 70.9 për qind të prodhimit kombëtar.

Qeveria parashikon një zgjerim me 3.4 për qind të ekonomisë shqiptare për vitin e ardhshëm.

Gjithashtu në seancën e parafundit për këtë vit, Kuvendi miratoi edhe projektligjin “Për vetëqeverisjen vendore” me 86 vota pro. Deputetët rrëzuan amendamentin e deputetit Bashkim Fino i cili kërkoi që kryetarët e Bashkive të kenë 2 mandate plus një me shkëputje. Ky amendament nuk mundi të marrë 84 votat e nevojshme.

Të tjera projektligje që u miratuan në këtë seancë ishin ai “Për disa shtesa dhe ndryshime në ligjin nr. 61/2012 “Për akcizat në Republikën e Shqipërisë’, të ndryshuar” me 85 vota pro, projektligji “Për disa shtesa dhe ndryshime në ligjin nr. 9975, datë 28.7.2008, me “Për taksat kombëtare”, të ndryshuar” me 81 vota pro, Projektligji “Për disa ndryshime dhe shtesa në ligjin nr. 9136, datë 11.9.2003, “Për mbledhjen e kontributeve të detyrueshme të sigurimeve shoqërore dhe shëndetësore në Republikën e Shqipërisë, të ndryshuar” me 83 vota, etj.

/ATSH/