Një mjet i ri i inteligjencës artificiale i quajtur OpenClaw po përhapet me shpejtësi në internet dhe po tërheq gjithnjë e më shumë përdorues, veçanërisht në Kinë. Megjithatë, ndërsa popullariteti i tij po rritet, autoritetet kineze kanë filluar të shprehin shqetësime serioze për rreziqet që mund të sjellë kjo teknologji.
OpenClaw është një agjent autonom i inteligjencës artificiale me burim të hapur që u lejon përdoruesve të krijojnë programe AI që mund të kryejnë detyra komplekse në kompjuter. Këto agjentë mund të shfletojnë internetin, të ekzekutojnë skripte dhe të kryejnë procese të ndryshme në mënyrë automatike, pa ndërhyrje të vazhdueshme nga përdoruesi.
Ndryshe nga chatbot-et klasike që funksionojnë vetëm brenda një shfletuesi, OpenClaw mund të ketë qasje më të gjerë në sistemin e kompjuterit, gjë që e bën atë shumë të fuqishëm, por edhe potencialisht të rrezikshëm. Popullariteti i OpenClaw është rritur me shpejtësi edhe në Kinë. Në rrjetet sociale, shumë përdorues krenohen se po “rrisin karavidhe”, një referencë humoristike ndaj maskotës së kuqe të këtij programi. Edhe kompani të mëdha teknologjike si Tencent dhe Alibaba kanë filluar ta integrojnë këtë teknologji në produktet e tyre. Ndërkohë, disa agjenci qeveritare kanë nënshkruar kontrata me startup-e që përdorin teknologjinë OpenClaw.
Interesi për këtë teknologji është bërë aq i madh sa që disa takime të komunitetit të përdoruesve të OpenClaw në Kinë po marrin përmasa të pazakonta. Në një aktivitet të zhvilluar së fundmi në Shenzhen, pjesëmarrësit madje kishin veshur kapele të mëdha në formë karavidheje të kuqe, duke e kthyer eventin në një lloj fenomeni kulturor mes entuziastëve të teknologjisë. Megjithatë, për shkak të rreziqeve të mundshme për sigurinë kibernetike, autoritetet kineze kanë filluar të ndërmarrin masa paralajmëruese. Sipas raportimeve të Reuters, disa agjenci qeveritare dhe kompani shtetërore u kanë kërkuar punonjësve të mos instalojnë agjentët OpenClaw në pajisjet e tyre të punës.
Arsyeja kryesore lidhet me rrezikun e rrjedhjes së të dhënave, fshirjen aksidentale të informacionit apo përdorimin e gabuar të të dhënave sensitive. Një burim i brendshëm tha se në disa institucione OpenClaw nuk është ndaluar plotësisht, por punonjësit janë këshilluar fuqimisht të mos e instalojnë. Kjo situatë është interesante sepse Kina në përgjithësi po promovon fuqishëm zhvillimin e inteligjencës artificiale si pjesë e strategjisë së saj për rritjen ekonomike. Pekini ka shpallur një plan të gjerë për të nxitur inovacionin në AI dhe për ta bërë këtë teknologji një nga shtyllat kryesore të zhvillimit të vendit. Megjithatë, disa raste problematike kanë treguar se teknologjitë e tilla mund të kenë pasoja të papritura. Edhe kompania Meta Platforms ka ndaluar përdorimin e OpenClaw në kompjuterët e punës së punonjësve të saj.
Një drejtore e sigurisë dhe përputhshmërisë në laboratorin e superinteligjencës së Meta, Summer Yue, tregoi në rrjetet sociale se një nga këta agjentë AI kishte filluar të fshinte automatikisht email-et e saj të rëndësishme. Ajo shkroi me humor se edhe pse i kishte kërkuar sistemit të konfirmonte çdo veprim para se ta kryente, programi gjithsesi nisi të fshinte gjithë inbox-in me shpejtësi.
Rasti tregon se ndërsa agjentët autonomë të inteligjencës artificiale po bëhen gjithnjë e më të fuqishëm dhe të përhapur, përdorimi i tyre kërkon kujdes të madh, veçanërisht kur bëhet fjalë për të dhëna sensitive dhe sisteme kritike.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
