Njerëzit zakonisht nuk ndihen rehat kur vendosen papritur në qendër të vëmendjes. Edhe profesionistë shumë të suksesshëm shpesh pyesin: “Çfarë duhet të bëj kur më vënë në siklet me një pyetje të papritur?”Frika më e madhe është se mund të flasin pa strukturë, të shmangen nga përgjigjja ose të duken në mbrojtje. Por mënyra se si reagoni në këto momente është shumë e rëndësishme. Nëse ruani qetësinë dhe mendoni shpejt, tregoni se jeni një profesionist që di të menaxhojë presionin, një cilësi shumë e rëndësishme në lidership.
Ekspertja e psikologjisë së punës dhe trajnerja ekzekutive Melody Wilding, me përvojë mbi 15 vjet në trajnimin e liderëve në kompani si Google dhe Amazon, sugjeron katër strategji të thjeshta për të menaxhuar pyetjet e papritura.
1. Flisni nga perspektiva e rolit tuaj
Instinkti i parë shpesh është të shmangni përgjigjen ose të përdorni shumë justifikime si: “Unë nuk jam personi më i mirë për këtë.”
Kjo nuk krijon besim. Në vend të kësaj, vendosni kufijtë e asaj që dini bazuar në përvojën ose rolin tuaj.
P.sh.:
- “Nga këndvështrimi i marketingut, mund të them se…”
- “Bazuar në projektet ku kam qenë i përfshirë…”
- “Nga informacioni që kam në lidhje me këtë klient…”
Kjo ju lejon të jepni një përgjigje të qartë pa pretenduar më shumë sesa dini.
2. Fitoni pak kohë duke bërë një pyetje
Kur një pyetje ju kap në befasi, bëni një pyetje sqaruese. Kjo ju jep disa sekonda për të menduar dhe njëkohësisht tregon se jeni duke dëgjuar me kujdes.
P.sh.:
- “Mund të sqaroni pak më shumë se çfarë ju shqetëson konkretisht?”
- “Cila pjesë e kësaj është më e rëndësishme për ju?”
- “Çfarë e bën këtë çështje urgjente tani?”
Lexo edhe: “Dora e Vdekur” ruse, arma automatike sovjetike që mund të shkatërrojë botën!
3. Kuptoni nevojën që fshihet pas pyetjes
Shumica e pyetjeve në fakt kërkojnë një nga këto tre gjëra:
- Siguri – “A është gjithçka nën kontroll?”
- Udhëzim – “Si duhet ta interpretoj këtë situatë?”
- Veprim – “Çfarë duhet të bëjmë tani?”
Në vend që të hyni në shumë detaje, fokusohuni tek ajo që personi në të vërtetë ka nevojë të dijë.
P.sh.:
- “Jemi në rrugën e duhur për të arritur objektivat këtë muaj.”
- “Kemi dy opsione: A ose B. Unë rekomandoj A.”
- “Projekti nis të hënën, kështu që ekipet mund të planifikojnë duke u bazuar tek kjo datë.”
4. Thoni “do t’ju përgjigjem më vonë”, por me autoritet
Nuk është problem nëse nuk keni menjëherë përgjigjen. E rëndësishme është të tregoni se po kërkoni një përgjigje më të saktë.
P.sh.:
- “Do të kontrolloj të dhënat që të jap numra të saktë.”
- “Dua t’ju jap një përgjigje të plotë. Mund të rikthehem deri të premten.”
- “Kjo meriton një analizë më të mirë. Më lini një ditë për ta menduar.”
Në një kohë kur shumë komunikim bëhet me email ose me ndihmën e AI, aftësia për të reaguar qartë dhe me vetëbesim në moment është gjithnjë e më e rëndësishme. Shpesh, njerëzit do të gjykojnë kompetencën tuaj pikërisht nga mënyra se si përgjigjeni në këto momente të papritura.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
