Sipas të dhënave më të fundit nga kompania e analizave Omdia, tregu europian i smartfonëve shënoi një rënie të lehtë prej 1% gjatë vitit 2025, duke arritur në 134.2 milionë pajisje të dërguara gjithsej. Viti u karakterizua nga kërkesa më e dobët e konsumatorëve dhe nga rregulloret e reja që kërkojnë dizajn më ekologjik dhe përdorimin e USB-C si standard karikimi.
Samsung vazhdoi të mbajë pozicionin e liderit në Europë me 46.6 milionë pajisje të dërguara. Pas një fillimi të ngadaltë në gjysmën e parë të vitit, kompania u rikuperua në gjysmën e dytë falë ofertave më të lira të Galaxy A16 dhe suksesit të madh të Galaxy A56, i cili u bë telefoni më i shitur në Europë për vitin 2025.
Apple pati një vit shumë pozitiv, me rritje prej 6% krahasuar me 2024-ën, duke arritur 36.9 milionë iPhone të shitur dhe një pjesë tregu rekord prej 27% në Europë. Performanca u nxitur kryesisht nga seria iPhone 16, modelet Pro Max të iPhone 16 dhe iPhone 17, si edhe nga iPhone 16e. Ky i fundit u bë shumë i kërkuar në Europë, pasi zëvendësoi modelet më të vjetra që u hoqën nga tregu për shkak të rregullores së re për USB-C.
Xiaomi mbeti në vendin e tretë në tregun europian me 16% të pjesës së tregut dhe 21.8 milionë pajisje të dërguara, megjithëse shënoi një rënie të lehtë prej 1%. Rritja e saj u mbështet kryesisht nga seria buxhetore Redmi dhe zgjerimi i dyqaneve fizike Xiaomi Store në disa vende europiane.
lexo edhe:Anthropic në konflikt me Pentagonin, SHBA kërkon AI të pakufizuar për përdorim ushtarak
Motorola u rendit e katërta, por me një rënie prej 5% në dërgesa gjatë vitit. Megjithatë, kompania u rikuperua në gjysmën e dytë të vitit, veçanërisht në tregje si Polonia, Italia, Spanja dhe Mbretëria e Bashkuar.
HONOR arriti për herë të parë të futet në pesë markat më të mëdha në Europë, me një rritje prej 4% dhe 3.8 milionë pajisje të dërguara. Suksesi i saj lidhet kryesisht me serinë X, e cila është më e përballueshme në çmim dhe i ka ndihmuar markës të zgjerojë praninë në dyqanet partnere dhe të ndërtojë terren për modelet më premium në të ardhmen.
Sipas analistëve të Omdia, pesë prodhuesit më të mëdhenj vazhdojnë të forcojnë pozitat e tyre në Europë, duke e bërë tregun gjithnjë e më konkurrues për markat më të vogla. Megjithatë, disa prodhues alternativë si vivo, Nothing dhe Fairphone shënuan rritje të forta, duke treguar se ka ende hapësirë për marka që sjellin produkte të diferencuara dhe qasje të reja në treg.
Për vitin 2026, parashikimet janë më të pasigurta për shkak të rritjes së mundshme të çmimeve të komponentëve dhe kufizimeve në furnizim. Analistët vlerësojnë se markat e mëdha do të jenë më rezistente falë fuqisë financiare dhe shtrirjes së tyre globale, ndërsa prodhuesit më të vegjël do ta kenë më të vështirë të mbajnë ritmin në një treg europian tashmë të pjekur dhe shumë konkurrues.
Në këtë kontekst, theksohet se diferencimi i produkteve, ndërtimi i markës dhe lidhja me konsumatorin janë faktorë kyç për suksesin afatgjatë në tregun europian të smartfonëve.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto