Pse historia e Richard Branson frymëzon më shumë se çdo tekst i shkruar nga AI?

Liderët frymëzues e dinë se një histori e mirë mund të ndryshojë mënyrën si mendojnë dhe veprojnë njerëzit. Këtë e ka treguar shpesh edhe sipërmarrësi britanik Richard Branson, i cili e ka kthyer rrëfimin personal në një mjet të fuqishëm drejtimi.

Në vitin 1987, Branson dhe piloti suedez Per Lindstrand u bënë të parët që kaluan Atlantikun me balonë me ajër të nxehtë. Aventurë historike, por që për pak i kushtoi jetën. Probleme teknike i detyruan të hidhen në Detin Irlandez. Pasi bashkëudhëtari u hodh i pari, balona u ngrit papritur në lartësi me Branson ende në të. Në mes të reve dhe pasigurisë, ai shkroi një mesazh lamtumire për familjen. Në fund, vendosi të mos hidhej menjëherë, por të manovronte balonën dhe të kërkonte një zgjidhje, një vendim që i shpëtoi jetën.

Lexo: “Smells Like AI Spirit”: Një ditë që e sjell Inteligjencën Artificiale nga teoria në praktikë në Tiranë

Më vonë, ai e përdori këtë përvojë si metaforë për biznesin: në momentet e krizës, liderët nuk duhet të kaplohen nga paniku, por të analizojnë opsionet me qetësi dhe guxim.

Ekspertët e komunikimit dhe neuroshkencëtarët theksojnë se pikërisht këtu qëndron diferenca mes një historie njerëzore dhe një teksti të krijuar nga inteligjenca artificiale. Modelet AI mund të analizojnë miliona tregime dhe të riprodhojnë struktura të njohura, si anija në mjegull, kapiteni i qetë dhe busulla si simbol drejtimi, por ato nuk përjetojnë emocione reale.

AI identifikon modele. Liderët kanë përvoja.

Sipas studiuesve, truri i njeriut është i programuar t’i kushtojë vëmendje historive të vërteta për rrezikun, sfidën dhe mbijetesën. Janë përvoja të jetuara që krijojnë rezonancë emocionale dhe lidhje autentike me audiencën.

Mesazhi për drejtuesit është i qartë: teknologjia mund të ndihmojë në strukturimin e një historie, por rrëfimet që prekin zemrat dhe frymëzojnë ekipe janë ato që burojnë nga përvoja personale – diçka që asnjë algoritëm nuk mund ta zëvendësojë.