Komisioni Europian ka nisur një hetim formal ndaj gjigantit kinez të modës së shpejtë, Shein, në kuadër të Aktit për Shërbimet Digjitale (DSA), duke rritur presionin mbi platformat e mëdha teknologjike që operojnë në tregun europian. Nëse konstatohen shkelje, kompania mund të përballet me gjoba të rënda.
Sipas deklaratës së publikuar të martën, hetimi përqendrohet në tre shqetësime kryesore: shitjen e produkteve të paligjshme në platformë, përfshirë produkte që mund të klasifikohen si material i abuzimit seksual të fëmijëve (CSAM), përdorimin e teknikave të dizajnit që nxisin varësi te përdoruesit, si dhe mungesën e transparencës mbi mënyrën se si platforma rekomandon produkte për konsumatorët.
Hetimi zhvillohet në bazë të Digital Services Act, ligji kyç i BE-së për përmbajtjen online, i cili zbatohet për platformat shumë të mëdha që nga fundi i vitit 2023.
Çfarë po hetohet konkretisht?
Komisioni do të shqyrtojë nëse Shein ka përdorur elemente dizajni që inkurajojnë angazhim të tepruar të përdoruesve, si sisteme shpërblimi me pikë apo stimuj të tjerë, të cilat mund të ndikojnë negativisht në mirëqenien e tyre. Sipas DSA-së, platformat shumë të mëdha online duhet të vlerësojnë dhe të zbusin rreziqet sistemike që lidhen me shërbimet e tyre.
Së dyti, hetimi do të analizojë nëse kompania ka vendosur mekanizma të mjaftueshëm për të parandaluar shitjen e produkteve të paligjshme brenda BE-së, përfshirë përmbajtje që mund të përbëjë abuzim seksual ndaj të miturve. Shein ishte vënë në shënjestër të Komisionit edhe në nëntor të vitit të kaluar, pas raportimeve për shitjen e produkteve të ndaluara në Francë.
Një element i tretë i hetimit lidhet me mënyrën se si platforma rekomandon produkte dhe përmbajtje për përdoruesit. Rregullat e BE-së kërkojnë që platformat të shpjegojnë qartë parametrat kryesorë të sistemeve të rekomandimit dhe të ofrojnë të paktën një opsion që nuk bazohet në profilizim.
Lexo edhe: Shpend Lila: Mungesa e domenit shtetëror po i kushton Kosovës miliona euro
Çfarë ndodh më tej?
Komisioni do të zhvillojë një hetim të thelluar, që mund të përfshijë kërkesa shtesë për informacion, intervista dhe masa monitorimi. Nëse konstatohen shkelje, Brukseli mund të vendosë masa të përkohshme, të pranojë angazhime detyruese nga kompania ose të miratojë një vendim për mosrespektim, i cili mund të çojë në gjoba të konsiderueshme.
“Digital Services Act mbron blerësit, garanton mirëqenien e tyre dhe i fuqizon me informacion mbi algoritmet me të cilat ndërveprojnë,” deklaroi Henna Virkkunen, nënkryetare ekzekutive për sovranitetin teknologjik, sigurinë dhe demokracinë.
Reagimi i Shein
Në një reagim për Euronews Next, Shein tha se i merr “seriozisht” detyrimet e saj sipas DSA-së dhe se ka bashkëpunuar plotësisht me Komisionin Europian dhe autoritetet përkatëse.
Kompania theksoi se muajt e fundit ka investuar ndjeshëm në forcimin e përputhshmërisë me rregullat europiane, duke përfshirë vlerësime të rreziqeve sistemike, mbrojtje të shtuar për përdoruesit e rinj dhe përmirësim të mjeteve për zbulimin e produkteve të ndaluara. Sipas saj, mbrojtja e të miturve dhe reduktimi i rrezikut nga përmbajtje apo sjellje të dëmshme janë thelbësore në funksionimin e platformës.
Hetimi vjen në një moment kur zgjerimi i Shein në Europë po shoqërohet me kritika në rritje. Në nëntor të vitit të kaluar, kompania hapi dyqanin e saj të parë të përhershëm në Paris, brenda dyqanit historik BHV, duke nxitur reagime të forta nga organizata për mbrojtjen e fëmijëve dhe të mjedisit, si dhe protesta publike.
E themeluar në Kinë në vitin 2012 dhe me seli aktuale në Singapor, Shein është shndërruar me shpejtësi në një fuqi globale të modës së shpejtë. Megjithatë, kompania është përballur edhe me akuza se zinxhirët e saj të furnizimit mund të jenë të lidhur me punë të detyruar, përfshirë në rajonin e Xinjiang-ut në Kinë, ku organizatat e të drejtave të njeriut kanë raportuar shkelje serioze ndaj pakicave etnike myslimane. Me hetimin e ri, Bashkimi Europian sinjalizon se zbatimi i rregullave digjitale po hyn në një fazë më të ashpër, ndërsa platformat globale përballen me përgjegjësi gjithnjë e më të mëdha në tregun europian.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
