Elon Musk, njeriu më i pasur në botë dhe pronar i platformës X, gjatë muajit janar ka postuar pothuajse çdo ditë për çështje që lidhen me racën dhe emigracionin. Sipas një analize të The Guardian, ai ka bërë postime për këto tema në 26 nga 31 ditët e muajit.
Në shumë prej postimeve të tij, Musk flet për “kërcënimin” ndaj të bardhëve, pretendon se ata po diskriminohen dhe shpërndan ide se emigrantët po “zëvendësojnë” popullsinë vendase. Ai ka ndarë edhe teori konspirative që flasin për një “gjenocid ndaj të bardhëve” dhe se në të ardhmen të bardhët rrezikojnë të bëhen pakicë në disa vende.
Ekspertët e ekstremizmit paralajmërojnë se këto janë narrativa të njohura të grupeve supremaciste të bardha. Sipas tyre, nëse postimet e Musk do të ishin pa emër, shumëkush do t’i ngatërronte me përmbajtje të prodhuar nga lëvizje ekstremiste.
Lexo edhe: Shqipëria në BIOFACH 2026: Pesë kompani promovojnë produktet e qëndrueshme
Prej vitesh, Musk ka shpërndarë përmbajtje kundër emigrantëve dhe ka mbështetur figura të ekstremit të djathtë. Por, sipas specialistëve, së fundmi ai po i bën këto qëndrime më të shpeshta dhe më të hapura, duke i dhënë më shumë peshë këtyre ideve, pasi ka mbi 200 milionë ndjekës.
Një problem i madh, sipas ekspertëve, është se ide të rrezikshme po normalizohen dhe po hyjnë në diskutimin publik, edhe pse këto narrativa janë lidhur me sulme të dhunshme raciste në SHBA dhe Europë vitet e fundit.
Musk ka mohuar se është racist apo antisemit dhe ka thënë se nuk mbështet dhunën. Ai pretendon se postimet e tij janë thjesht “fakte” ose mendime personale. Megjithatë, ekspertët thonë se mënyra se si ai flet për racën dhe emigracionin ndihmon në përhapjen e frikës dhe përçarjes në shoqëri.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
