Pamjet e dhunshme që qarkullojnë çdo ditë në rrjetet sociale nuk janë thjesht “video që kalojnë në feed”. Ato lënë gjurmë. Psikologët paralajmërojnë se ekspozimi i vazhdueshëm ndaj skenave tronditëse mund të ndikojë seriozisht në shëndetin mendor, duke rritur ankthin, stresin dhe madje simptomat e traumës post-traumatike.
Sipas studiuesve, të jesh dëshmitar virtual i dhunës nuk do të thotë të jesh i paprekur prej saj. Profesor James Densley nga Metro State University në Mineapolis thekson se personat që kanë ndjekur vazhdimisht pamje të sulmeve apo fatkeqësive kanë shfaqur nivele të rritura të stresit post, traumatik, në disa raste, pothuajse të krahasueshme me ata që kanë pasur lidhje të drejtpërdrejtë me ngjarjen.
Fenomeni njihet si traumë dytësore. Truri, thonë ekspertët, nuk bën dallim të madh mes përjetimit real dhe atij të parë në ekran. Sa herë që shohim një video të dhunshme, sistemi nervor aktivizohet sikur rreziku të ishte i pranishëm. Mund të shfaqen mendime ndërhyrëse, çrregullime gjumi, hipervigjilencë apo mpirje emocionale.
Problemi thellohet nga mënyra si funksionojnë rrjetet sociale, pamje të papritura, pa paralajmërim, në cilësi të lartë dhe me realizëm maksimal. Truri nuk ka kohë të “çaktivizohet”. Çdo rishikim e përforcon reagimin e stresit, duke e kthyer konsumimin pasiv të përmbajtjes në një barrë të heshtur emocionale.
Empatia është një vlerë njerëzore thelbësore, por kur ekspozimi bëhet i vazhdueshëm, sistemi ynë emocional lodhet. Në vend të angazhimit konstruktiv, mund të shfaqet shmangie, frikë apo ndjesi e vazhdueshme kërcënimi.
Ekspertët theksojnë se disa individë janë më të ndjeshëm, sidomos ata me përvoja të mëparshme traumatike ose kur ngjarjet ndodhin në mjedise të njohura për ta. Në këto raste, videot mund të veprojnë si “nxitës” të fortë emocionalë.
Mesazhi i psikologëve është i qartë: truri i njeriut nuk është krijuar për të konsumuar pa kufi dhunë reale në ekran. Kufizimi i ekspozimit, pushimet nga rrjetet sociale dhe kujdesi për mirëqenien emocionale janë hapa të domosdoshëm në një epokë ku dhuna shpërndahet me një klikim.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
