Departamenti Amerikan i Drejtësisë ka publikuar miliona faqe dokumentesh të lidhura me çështjen Epstein, më shumë se një muaj pasi kishte kaluar afati ligjor për publikimin e tyre, i përcaktuar nga ligji federal. Kongresi miratoi legjislacionin që detyron publikimin e dosjeve të Epstein në nëntor, pas reagimeve të forta publike që u shkaktuan nga deklarata e Departamentit të Drejtësisë se nuk do t’i bënte dokumentet publike në mënyrë vullnetare.
Jeffrey Epstein vdiq në burg në vitin 2019, pasi ishte paditur për akuza të rënda për trafikim seksual. Megjithatë, rasti i tij ka mbetur prej vitesh në qendër të vëmendjes publike, kryesisht për shkak të lidhjeve të tij me figura shumë të njohura të botës së biznesit, politikës dhe teknologjisë. Në dosjet e publikuara përmenden emra të njohur të miliarderëve dhe figurave me ndikim, përfshirë Bill Gates, ish-presidentin Donald Trump, CEO-n e Tesla-s Elon Musk, ish-presidentin amerikan Bill Clinton, themeluesin e Virgin Group Richard Branson, bashkëthemeluesin e Google Sergey Brin, kryetarin e New York Giants Steve Tisch dhe bashkëthemeluesin e PayPal, Peter Thiel. Është e rëndësishme të theksohet se asnjëri prej këtyre personave nuk është akuzuar për ndonjë shkelje ligjore në lidhje me çështjen Epstein dhe të gjithë kanë mohuar çdo dijeni për abuzimet e tij.
Zëvendësprokurori i Përgjithshëm i SHBA, Todd Blanche, mohoi se administrata Trump ka “mbuluar” dokumentet, duke deklaruar se bëhet fjalë për miliona faqe që kërkojnë kohë për t’u shqyrtuar dhe se “nuk ka një grup dokumentesh sekrete që po mbahen fshehur”.Sipas DOJ, dokumentet përfshijnë materiale nga hetimet penale ndaj Epstein dhe Maxwell, disa hetime të FBI-së dhe hetimin mbi vdekjen e Epstein.
Faktet kryesore që dihen deri tani:
- Departamenti Amerikan i Drejtësisë publikoi rreth 3 milionë dokumente mbi çështjen Epstein.
- Publikimi përfshin rreth 2,000 video dhe 18,000 foto.
- Dokumentet u bënë publike më shumë se një muaj me vonesë, pasi afati ligjor kishte qenë 19 dhjetori.
- Dosjet përmbajnë:email-e mes Epstein dhe personave me ndikim, përfshirë Elon Musk, dokumente mbi periudhën e Epstein dhe Ghislaine Maxwell në burg, intervista me viktimat e Epstein, pjesërisht të redaktuara,
- Zëvendësprokurori i Përgjithshëm Todd Blanche mohoi se administrata Trump ka “mbuluar” dokumentet.
- Sipas Blanche, vonesa lidhet me faktin që miliona faqe duhej të shqyrtoheshin përpara publikimit.
- Departamenti i Drejtësisë deklaron se nuk ka dokumente super-sekrete të fshehura.
- Dosjet përfshijnë materiale nga: hetimet penale ndaj Epstein dhe Maxwell, hetime të shumta të FBI-së, hetimin zyrtar mbi vdekjen e Epstein
Lexo edhe:Gjermania hap fabrikën më të madhe të AI-së në Evropë
Donald Trump
Presidenti i SHBA-së përmendet qindra herë në dosjet e publikuara së fundmi, përfshirë edhe një listë të përpiluar nga FBI vitin e kaluar me pretendime të bëra kundër Trump nga telefonues në linjën kombëtare të FBI-së për raportimin e kërcënimeve. Shumë prej këtyre pretendimeve duket se bazohen në sinjalizime të paverifikuara të marra nga agjencia dhe janë bërë pa prova mbështetëse. Lista përfshin akuza të shumta për abuzim seksual të bëra ndaj Trump, Epstein dhe figurave të tjera të njohura publikisht. Trump ka mohuar vazhdimisht çdo keqbërje në lidhje me Epstein, me të cilin thotë se ka ndërprerë kontaktet dekada më parë, dhe nuk është akuzuar për asnjë krim nga viktimat e Epstein.
Borge Brende: Presidenti i Forumit Ekonomik Botëror nën hetim
Forumi Ekonomik Botëror, organizatori i konferencës së famshme vjetore në Davos, ka hapur një hetim ndaj presidentit dhe CEO-së së tij, Borge Brende, për lidhjet e dyshuara me Epstein. Brende, ish-ministër i financave i Norvegjisë, është CEO i këtij institucioni prestigjioz që nga viti 2017. Hetimi po fokusohet te tre darka biznesi që Brende ka pasur me Epstein. Në disa email-e nga viti 2018 dhe 2019 të përfshira në publikimin e fundit, Brende duket se i konfirmon këto takime. Ai gjithashtu ka komunikuar me Epstein edhe përmes mesazheve. Në një mesazh nga viti 2018, Brende e falënderon Epstein për “një darkë shumë interesante”, duke shtuar më pas: “ushqim për mendim. Je një mikpritës brilant”. Në përgjigje, Epstein i shkruan se “të dy, Bannon, Leon dhe unë, mbetëm shumë të impresionuar nga ti”, duke i dërguar më pas një foto të ish-këshilltarit të Trump, Steve Bannon, me Brende dhe diplomatin norvegjez Terje Rød-Larsen. Në një deklaratë për mediat, Forumi Ekonomik Botëror bëri të ditur se Brende po bashkëpunon me hetimin dhe se vetë ka kërkuar rishikimin e çështjes. Brende i tha Reuters se ishte “plotësisht i pavetëdijshëm për të kaluarën dhe aktivitetet kriminale të Epstein” dhe se do t’i kishte refuzuar ftesat po të kishte pasur dijeni për këtë.
Brad Karp jep dorëheqjen: avokati i fuqishëm e quante Epstein “mahnitës”
Brad Karp dha dorëheqjen nga posti i kryetarit të firmës së njohur ligjore Paul, Weiss, Rifkind, Wharton & Garrison LLP. Në një email të vitit 2015 të përfshirë në dosje, Karp e falënderon Epstein për “një mbrëmje që nuk do ta harroj kurrë”. Në përgjigje, Epstein i shkruan se “je gjithmonë i mirëpritur” dhe se “do të ftohesh shpesh”. Një përfaqësues i Karp i tha New York Times se ai kishte marrë pjesë vetëm në dy darka në grup në Nju Jork dhe kishte pasur disa kontakte sociale me email, të cilat i konsideron sot si gabime.
Elon Musk: plane për vizitë në ishullin e Epstein
Në dosje përfshihen shkëmbime email-esh mes Epstein dhe Elon Musk për plane vizite në ishullin privat të Epstein në vitet 2012 dhe 2013. Në një email, Musk pyet Epstein se “cila ditë/natë do të jetë festa më e çmendur në ishullin tënd”. Nuk është e qartë nëse vizita ka ndodhur ndonjëherë. Musk ka deklaruar publikisht se ka refuzuar ftesat për të shkuar në ishull dhe se nuk ka pasur përfshirje në ndonjë veprimtari të paligjshme.
Bill Gates: pretendime të forta nga Epstein, të mohuara nga Fondacioni Gates
Dosjet përfshijnë email-e të vitit 2013 ku Epstein bën akuza të forta ndaj Bill Gates, përfshirë pretendime për sjellje moralisht të papërshtatshme. Një zëdhënës i Fondacionit Gates i ka quajtur këto akuza “absolutisht absurde dhe plotësisht të pavërteta”, duke theksuar se Epstein ishte një gënjeshtar i provuar dhe se dokumentet tregojnë vetëm frustrimin e tij që nuk kishte më marrëdhënie me Gates.
Sergey Brin: Foto nga ishulli i Epstein
Bashkëthemeluesi i Google, Sergey Brin, i cili tashmë dihej se ishte shoqëruar me Epstein, ndodhet në grupin e fundit të dosjeve të Epstein. Miliarderi ishte në një foto të pashënuar me datë që duket se e tregon atë në ishullin privat të Epstein, ku fotoja përfshin gra fytyrat e të cilave janë të fshehura.
Steven Sinofsky: Epstein vë ekzekutivin e Microsoft në kontakt me Tim Cook
Ish-ekzekutivi i Microsoft, Steven Sinofsky, kërkoi vazhdimisht ndihmën e Epstein ndërsa negocionte largimin e tij nga Microsoft, tregojnë email-et e publikuara. Sinofsky u largua papritur nga Microsoft në fund të vitit 2012, pas publikimit të Windows 8, mes raporteve për përplasje me ekzekutivë të tjerë, dhe tani shërben në bordin e firmës së kapitalit sipërmarrës Andreessen Horowitz. Epstein duket se e ndihmoi Sinofskyn të negocionte paketën e tij të pensionit prej 14 milionë dollarësh nga Microsoft, dhe Sinofsky i dërgoi Epstein-it email-e të brendshme midis ekzekutivëve të Microsoft për dështimin e produkteve Surface të kompanisë në 2012 para se ai të largohej nga kompania.
Peter Attia, themeluesi i Outlive : “Është e turpshme…”
Peter Attia, themelues i aplikacionit të jetëgjatësisë Outlive dhe një nga zërat më të ndjekur në fushën e shëndetit dhe biohacking-ut, është përmendur në dosjet e Epstein përmes emaileve që sugjerojnë një marrëdhënie të afërt mes tyre. Në një email të vitit 2016 drejtuar sekretares së Epstein, Lesley Groff, Attia shkruante se “i mungonte Epstein kur nuk e shihte”. Pas publikimit të dokumenteve, Attia reagoi publikisht duke kërkuar ndjesë për lidhjen e tij me Epstein dhe duke theksuar se vizitat e tij në shtëpinë e Epstein në Nju Jork nuk kishin lidhje me aktivitetet kriminale të këtij të fundit. Ai theksoi se nuk kishte udhëtuar kurrë me avionin e Epstein dhe nuk kishte vizituar ishullin apo fermën e tij. Në lidhje me disa shkëmbime emailesh ku Epstein i referohej dërgesave të reja të një medikamenti dhe shoqëronte mesazhin me një foto (e redaktuar në dokumente), Attia pranoi se sot i duket shumë e sikletshme ajo komunikim dhe se nuk e mbron aspak mënyrën e sjelljes së tij në atë periudhë. Sipas tij, në atë kohë e kishte interpretuar bisedën si “juvenile”, pa e kuptuar rëndësinë dhe kontekstin problematik të situatës.
Reid Hoffman, bashkëthemelues i LinkedIn: “Më vret ndërgjegjja që i dhashë legjitimitet”
Reid Hoffman, bashkëthemelues i LinkedIn dhe një nga investitorët më të njohur në Silicon Valley, është një tjetër figurë që përmendet në dokumentet e reja. Email-et e publikuara tregojnë se ai ka vizituar disa nga pronat e Epstein, përfshirë edhe ishullin e tij në vitin 2014, gjatë një udhëtimi që sipas Hoffman lidhej me mbledhje fondesh për MIT. Hoffman ka deklaruar publikisht se i vjen thellësisht keq për çdo lidhje me Epstein pas dënimit të tij dhe se fakti që i ka dhënë një lloj legjitimiteti përmes shoqërimit e ka vonuar drejtësinë për viktimat. Ai ka theksuar se nuk është i lidhur me asnjë shkelje apo krim, por se marrëdhënia e tij me Epstein mbetet një gabim i madh personal.
Bill Clinton
Në publikimin e parë të dokumenteve të Epstein nga Departamenti i Drejtësisë në dhjetor, disa imazhe shfaqnin ish-presidentin e SHBA-së, Bill Clinton, përfshirë një foto ku ai po noton në një pishinë dhe një tjetër ku shfaqet i shtrirë me duart pas kokës në atë që duket të jetë një vaskë me ujë të nxehtë. Clinton është fotografuar disa herë me Epstein gjatë viteve 1990 dhe fillimit të viteve 2000, përpara se Epstein të arrestohej për herë të parë.
Një zhvillim tjetër që la pa fjalë disa aktivistë LGBT: Jeffrey Epstein diskutoi me biologë amerikanë në vitin 2018 për shtyrjen e ideologjisë transgjinore te të miturit për “kastrimin”, vite përpara se transgjinorizmi të glorifikohej gjerësisht në media.
Pse kjo ka rëndësi për botën e teknologjisë?
Rasti Epstein po rihap debatin mbi etikën, përgjegjësinë personale dhe rrezikun e “normalizimit” të marrëdhënieve me figura problematike në botën e teknologjisë dhe sipërmarrjes. Për një industri që shpesh flet për vlera, impakt social dhe inovacion me përgjegjësi, këto lidhje tregojnë se reputacioni dhe ndikimi mund të përdoren për të fshehur realitete të errëta.
*Dosjet përfshijnë gjithashtu raportime dhe denoncime të pakonfirmuara të dërguara në FBI, përfshirë pretendime të dorës së dytë për figura politike. Vetë Departamenti i Drejtësisë ka theksuar se dokumentet mund të përmbajnë materiale të rreme ose të pabazuara, çka e bën edhe më të rëndësishme verifikimin e informacionit përpara se të nxirren përfundime!
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
