ANDRRA, e para platformë digjitale shqiptare për shëndetin riprodhues dhe prindërimin

Andrra është aplikacioni i parë gjithëpërfshirës në gjuhën shqipe që mbështet gratë në çdo fazë të shtatzënisë dhe menaxhimit të ciklit menstrual. Ideja lindi nga nevoja për një platformë të sigurt, edukative dhe të thjeshtë për përdorueset shqiptare, që nuk ishte e mbuluar nga aplikacionet ndërkombëtare. Falë teknologjisë dhe inteligjencës artificiale, Andrra ofron kalkulatorë të ovulimit dhe lindjes, udhëzime për ushqyerjen me gji dhe këshilla praktike për prindërimin. Përmes një ekosistemi të bazuar në ekspertizë mjekësore dhe mbështetje komunitare, platforma po revolucionarizon mënyrën se si gratë dhe prindërit marrin informacion të saktë dhe asistencë. BusinessMag bisedoi me Bardha Ajvazi, bashkëthemeluese dhe CEO e Andrra, për të zbuluar rrugëtimin, sfidat dhe planet për të ardhmen e aplikacionit.

Çfarë ju frymëzoi të krijonit Andrra dhe si lindi ideja për një aplikacion që mbështet gratë në çdo fazë të shtatzënisë dhe menaxhimin e ciklit menstrual?

Ideja për Andrra lindi nga një nevojë shumë personale, por edhe universale. Si nënë dhe si profesioniste në fushën e inovacionit dhe transformimit digjital, kuptova se mungonte një hapësirë e sigurt, edukative dhe praktike në gjuhën shqipe për gratë dhe prindërit. Shumë aplikacione ndërkombëtare ekzistonin, por asnjë nuk adresonte realitetin kulturor dhe gjuhësor të vendit tonë.
Kështu, Andrra u krijua si aplikacioni i parë gjithëpërfshirës për shëndetin riprodhues, shtatzëninë dhe prindërimin në gjuhën shqipe, me qëllimin për të fuqizuar gratë që të kuptojnë trupin e tyre, të ndihen të mbështetura gjatë shtatzënisë dhe të kenë një udhëzues të besueshëm pas lindjes. Emri “Andrra” përfaqëson ëndrrën për një përvojë prindërimi më të vetëdijshme, më të informuar dhe më të lidhur me teknologjinë.