Gënjeshtra e një fëmije shpesh shihet nga prindërit si mungesë respekti ose sjellje që duhet ndëshkuar menjëherë. Por sipas ekspertes së prindërimit dhe zhvillimit emocional, Alyssa Blask Campbell, ndëshkimi krijon frikë, dhe frika prodhon edhe më shumë gënjeshtra.
Sipas saj, gënjeshtra tek fëmijët është pjesë normale e zhvillimit dhe tregon se truri i tyre po mëson të planifikojë, të imagjinojë dhe të zgjidhë probleme. Nuk është një dështim moral, por një fazë që kërkon qasje të zgjuar nga prindërit.
Ekspertja thekson se çelësi për të rritur fëmijë të ndershëm është ta bësh ndershmërinë të ndihet e sigurt, jo e frikshme. Në vend të qortimit apo turpërimit, ajo rekomandon përdorimin e fjalive që transmetojnë dashuri, siguri dhe mirëkuptim, si: “Nuk jam i/e zemëruar, dua vetëm të kuptoj çfarë ndodhi” ose “Të dua edhe kur gabon, është e sigurt të më thuash të vërtetën”.
Campbell sugjeron që prindërit të shohin gjithmonë stresin apo frikën që fshihet pas një gënjeshtre. Në shumë raste, fëmijët gënjejnë për të shmangur ndëshkimin, për të mos zhgënjyer dikë ose për të ruajtur pavarësinë e tyre. Kur prindi reagon me qetësi dhe empati, fëmija mëson se e vërteta çon drejt zgjidhjes, jo drejt dënimit.
Për të ndërtuar një kulturë ndershmërie në familje, ekspertja këshillon prindërit të normalizojnë gabimet, të pranojnë emocionet e fëmijëve dhe të ruajnë kufij të qartë pa humbur ndjeshmërinë. Sa më i sigurt të ndihet një fëmijë emocionalisht, aq më i hapur do të jetë për të thënë të vërtetën, edhe kur ajo është e vështirë.
Mesazhi i saj është i qartë, në vend që të pyesim “si ta ndaloj fëmijën të gënjejë?”, duhet të pyesim “nga çfarë po përpiqet të mbrohet?”. Vetëm kështu ndërtohet një marrëdhënie besimi që zgjat gjithë jetën.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
