Shtëpia italiane e modës, Valentino, po përballet me kritika për reklamat “shqetësuese” për një prej çantave luksoze, të realizuar me inteligjencë artificiale .
Marka njoftoi një bashkëpunim me artistët digjitalë si pjesë të asaj që e quajti një “projekt krijues digjital” ku promovonte çantën e re DeVain. Por reklama me AI e postuar në Instagram është kritikuar pasi fansat e kanë quajtur përdorimin e teknologjisë si “të rrëmujshëm“ dhe “të trishtë”.
Në postim është vendosur etiketa që tregon se është përdorur AI. Modelet ‘dalin’ nga zbukurimet e çantës, logoja shndërrohet në krahët e njerëzve që më pas bashkohen dhe duken si një spirale trupash. “Zhgënjyese nga një shtëpi e modës së lartë”, shkruhet në njërin prej komenteve. “Fushatat reklamuese janë një mundësi për të vënë talentet në qendër të vëmendjes. AI në këtë rast është dembel”, vijon një tjetër. Industria e modës dhe sektorë të tjerë krijues, janë kthyer drejt mjeteve të AI si një formë për të pakësuar kostot e prodhimit dhe reklamimit. Njëkohësisht është parë si mundësi për të parë sesi teknologjia e re mund të ndihmojë procese thelbësore si dizenjimi, prodhimi dhe përmasat. Kjo ka shkaktuar shqetësime se rritja e përdorimit të AI mund të zëvendësojë njerëzit ose të ulë cilësinë e artikujve të modës.
Lexo edhe:Ligji i ri i taksës mbi pronën nis zbatimin në 2028-ën, ja ç’përmban
AI mund të ndihmojë, por njerëzit mbeten çelësi i besimit te konsumatorët
Çfarë mund të mësojnë bizneset e vogla dhe të mesme nga këto dështime të fundit në fushatat me inteligjencë artificiale? E thjeshtë: ekipet e vogla të marketingut mund të përfitojnë shumë nga AI gjenerative, por ajo duhet të përdoret si mjet, jo si qëllim. Mjetet e AI-së mund të ndihmojnë në detyra si hartimi i postimeve për rrjetet sociale, ideimi i fushatave apo krijimi i vizualeve të thjeshta, gjë që kursen kohë dhe burime.
Megjithatë, mbështetja e tepruar te teknologjia për të prodhuar përmbajtje kreative mund t’i bëjë fushatat të duken të ftohta dhe jopersonale, duke rrezikuar t’i largojë klientët, veçanërisht në një kohë kur AI ende shihet si teknologji e re dhe e pasigurt.
“Epoka e përmbajtjes së bërë shpejt e pa kujdes do t’i largojë plotësisht audiencat,” thotë Jake Atkinson, Drejtor i Rritjes në kompaninë e teknologjisë së hipotekave MQube. “Pse njerëzit duhet të angazhohen me një brand që nuk tregon dëshirë të angazhohet personalisht me ta?”
Ndërkohë, Megan Dooley, Shefe e Brandit në TAL Agency, këshillon bizneset që të “fokusohet te kuptimi i vërtetë i audiencës së tyre” dhe të mësojnë se cilat kanale përdorin ata për t’u ofruar përmbajtje me vlerë dhe në mënyrë konsistente.
“AI është e dobishme sepse kursen kohë dhe ofron frymëzim,” shton Dooley. “Por pikërisht ajo prekje njerëzore është ajo që ndërton besim dhe krijon marrëdhënie afatgjata.”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
