Inteligjenca artificiale po bëhet pjesë e çdo industrie dhe strategjitë tradicionale të korporatave po dalin jashtë loje. Ajo që dikur përcaktonte suksesin, shkalla e prodhimit dhe përmasat e kompanisë, nuk mjafton më. Sot, fiton ai që kontrollon të dhënat, njohurinë dhe algoritmet.
Tre profesorë të njohur të Harvardit dhe universitetit të Bostonit, Vijay Govindarajan, Venkat Venkatraman dhe Bill Achtmeyer, paralajmërojnë se kompanitë që nuk përshtaten me logjikën e re të “inteligjencës” rrezikojnë të mbeten prapa. Në një analizë të fundit për Harvard Business Review, ata zbërthejnë tre pyetje thelbësore që çdo drejtues duhet t’i bëjë vetes në këtë epokë të re:
Çfarë logjike ka portofoli ynë?
Nuk mjafton më të jesh i larmishëm në tregje të ndryshme. Sot rëndësi ka nëse bizneset e tua ndajnë të dhëna dhe ekspertizë që krijojnë vlerë të përbashkët.
Si funksionon modeli ynë korporativ?
Strukturat tradicionale me ndarje të ngurta duhet të zëvendësohen me modele bashkëpunimi horizontal dhe eksperimentim të shpejtë, ku të gjitha njësitë ndajnë njohuritë që gjeneron AI.
Cilat janë algoritmet tona unike?
Në vend të teknologjive fizike apo markave të fuqishme, avantazhi i ri konkurrues janë algoritmet që mësojnë nga të dhënat e vetë kompanisë dhe përmirësohen çdo ditë.
Një shembull i qartë është Intercorp në Peru, një konglomerat që po transformon mënyrën si përdor të dhënat nga bankat, shëndetësia dhe arsimi për të ofruar shërbime të personalizuara për miliona klientë. Nga ndarja klasike e bizneseve, Intercorp po kthehet në një ekosistem inteligjent, ku çdo njësi mëson nga tjetra në kohë reale.
Autorët theksojnë se nëse dikur suksesin e përcaktonin asetet fizike, sot ai matet me kapacitetin për të ndërtuar “inteligjencë kolektive” brenda kompanisë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
