Kontrollet e reja kufitare në BE, ja çfarë duhet të dinë udhëtarët

Sistemi i ri i hyrje/daljeve të BE-së (EES) do të nisë më 12 tetor. Pas vendosjes, udhëtarët jo-BE që përdorin Eurostar (Eurostar është një shërbim hekurudhor ndërkombëtar me shpejtësi të lartë që lidh Londrën me qytete të mëdha të Europës Perëndimore përmes Tunelit nën Kanalin Anglez ) nga Britania drejt zonës Schengen do të duhet të skanojnë pasaportat ose dokumentet e tjera të udhëtimit në kioska të dedikuara në stacionin London St Pancras International.

Gjatë procesit, do të pyeten për planet e tyre të udhëtimit. Raportimet e para në mediat britanike sugjeruan se pasagjerët do të duhet të dëshmojnë se kanë sigurim shëndetësor.

Çfarë konfirmojnë Eurostar dhe qeveria britanike?

Sipas procedurës, sistemi do të regjistrojë emrin, të dhënat biometrike dhe datën e hyrjes/daljes. Pasagjerët do t’u përgjigjen katër pyetjeve: nëse kanë akomodim të rezervuar, biletë kthimi, fonde të mjaftueshme për qëndrimin dhe sigurim.

Nëse një përgjigje është “jo”, rasti kalon tek policia kufitare franceze dhe hyrja mund të refuzohet. Përgjigjet e pasakta gjithashtu mund të verifikohen.

Megjithatë, Eurostar sqaroi se pyetja për “sigurim shëndetësor” ishte gabim përkthimi: në fakt bëhet fjalë për “sigurim udhëtimi”. Edhe qeveria britanike konfirmoi se nuk do të ketë kërkesë detyruese për sigurim shëndetësor. Sërish, ajo këshillon udhëtarët të blejnë sigurim të plotë udhëtimi që përfshin mbulimin mjekësor.

Franca mban ende rregulla të sajat

Sipas autoriteteve franceze, shtetasit e vendeve të treta që hyjnë në Francë duhet të kenë një policë sigurimi që mbulon shpenzimet mjekësore, spitalore dhe riatdhesimin. Në praktikë, ky kontroll nuk është aplikuar shpesh, por me nisjen e EES mbetet e paqartë nëse do të zbatohet më rreptësisht.

Një tjetër kërkesë e Francës është posedimi i një bilete kthimi ose prove për udhëtim të mëtejshëm jashtë zonës Schengen.