Sipërmarrësi i teknologjisë dhe influencuesi i njohur për eksperimentet anti-plakje, Bryan Johnson, ka ndarë së fundmi disa këshilla të rëndësishme për ndjekësit e tij. Në një postim në platformën X , ai dha një mesazh të qartë: jetëgjatësia nuk kërkon pasuri, por konsistencë.
Në një video të shkurtër të publikuar, Johnson theksoi se nuk nevojiten trajtime të shtrenjta apo teknologji të avancuara për një jetë të shëndetshme, por vetëm disa zakone të përditshme që mund të sjellin ndryshime të mëdha.
Pesë zakonet e jetëgjatësisë sipas Bryan Johnson:
-
Prioritizoni gjumin: Johnson e quan gjumin “ilaçi i jetëgjatësisë” që është i aksesueshëm për të gjithë. Ai këshillon krijimin e një rutine të përditshme për të marrë mjaftueshëm pushim.
-
Hani ushqime të plota: Ai sugjeron të hiqet dorë nga ushqimet e përpunuara dhe të zgjidhen ushqimet natyrale, të pasura me vlera ushqyese. Zgjedhjet e vogla në dietë, sipas tij, japin përfitime të mëdha në afatgjatë.
-
Ruani lidhjet shoqërore: “Njeriu lulëzon në komunitet” – thotë Johnson, duke nënvizuar rëndësinë e marrëdhënieve shoqërore për shëndetin fizik dhe mendor.
-
Lëvizni çdo ditë: Ai këmbëngul mbi rëndësinë e aktivitetit fizik. Qoftë një shëtitje, ushtrime të lehta apo stretching, lëvizja e përditshme është thelbësore.
-
Shmangni zakonet e dëmshme: Johnson paralajmëron kundër konsumit të tepruar të alkoolit dhe përdorimit të tepërt të rrjeteve sociale, të cilat dëmtojnë mirëqenien mendore dhe fizike.
Rutina bazë e përditshme e Bryan Johnson
Së fundmi, 47-vjeçari ka ndarë edhe një rutinë të thjeshtë për të shmangur mungesën e energjisë gjatë mëngjesit apo pasditeve të lodhshme. Ai thekson se çelësi është thjeshtësia dhe qëndrueshmëria.
Kjo është rutina e tij 6-hapëshe:
-
12:00 – filxhani i fundit i kafesë
-
18:00 – vakti i fundit i ditës
-
21:00 – fikni ekranet
-
21:00-22:00 – qetësoni veten, bëni 10 minuta ushtrime frymëmarrjeje (teknika 4:6)
-
22:00 – gjumi
-
06:00 – ushtrime fizike
“Bëjeni çdo ditë. Jini të qëndrueshëm. Jepini 5 ditë kohë. Përshtatni oraret sipas nevojës,” shkruan Johnson.
Mesazhi i tij i fundit është i qartë: nuk të duhet të jesh milioner për të jetuar më gjatë, mjafton të ndërtosh zakone të thjeshta dhe t’u përmbahesh atyre me konsistencë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
