Bashkimi Europian po kërkon të përshpejtojë punën për krijimin e një Euroje digjitale, sipas një raporti të Financial Times, i cili referohet te burime që janë pjesë e konsultimeve për këtë çështje. Lëvizja vjen pas miratimit të një ligji të ri në Shtetet e Bashkuara për rregullimin e ashtuquajturave Stablecoins, i cili ka rritur shqetësimet për konkurrueshmërinë e monedhës europiane në tregjet globale.
Sipas burimeve për gazetën britanike, në Bruksel po shqyrtohen edhe alternativa teknike. Ndërsa fillimisht pritej që Euroja digjitale të funksiononte në një sistem privat, përfaqësuesit e BE-së po konsiderojnë që ajo të lëvizë mbi blockchain publik si Ethereum ose Solana. Një avantazh i tillë do të ishte tregtueshmëria globale e Euros digjitale. Megjithatë, ekzistojnë shqetësime serioze për transparencën e rrjeteve publike, pasi transaksionet aty janë në thelb të hapura dhe të shikueshme nga të gjithë.
Banka Qendrore Europiane (BQE) punon prej vitesh mbi mundësinë e një Euroje digjitale. Sipas mbështetësve të projektit, kjo monedhë mund të ofrojë qytetarëve një mundësi të sigurt pagese digjitale, drejtpërdrejt nga banka qendrore, veçanërisht në kohë kur përdorimi i parasë fizike po zvogëlohet. Një monedhë e tillë gjithashtu mund të forcojë rolin ndërkombëtar të Euros.
Lexo edhe: Kina dhe Amerika, a mund të bashkohen dy botë kaq të ndryshme?
Megjithatë, projekti nuk kalon pa kritikë. Në rrjet qarkullojnë teori të ndryshme konspirative, nga paralajmërimet për një “diktaturë Euro” deri te thirrjet që paraja e gatshme duhet të mbetet përgjithmonë. Edhe përtej këtyre ekstremiteteve, iniciativa mbetet e debatueshme. Ndërsa Banka Federale Gjermane thekson përfitimet në faqet e saj informative, ekspertët financiarë hedhin dyshime mbi koston dhe zbatueshmërinë e projektit.
Volker Brühl, profesor për Bankingun dhe Financat në Universitetin Goethe të Frankfurtit, i tha Berliner Zeitung se mund të lindin shpenzime miliardëshe, për shkak të përshtatjeve në sektorin bankar dhe burimeve shtesë për BQE-në. Aktualisht, niveli i detajuar i këtyre kostove nuk është transparent.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
