Nëse jeni në Britani, gjasat janë që këtë javë të keni punuar nga shtëpia të paktën dy ditë. Dhe sipas të dhënave të fundit, britanikët janë kampionët evropianë të kësaj forme të re pune, duke kaluar shumë nga fqinjët e tyre kontinentalë. Sipas një sondazhi global mbi mënyrat e punës (Global Survey of Working Arrangements – G-SWA), punonjësit në Mbretërinë e Bashkuar punojnë mesatarisht 1.8 ditë në javë nga shtëpia, më shumë se çdo vend tjetër në Evropë dhe i dyti në rang global – menjëherë pas Kanadasë (1.9 ditë). Por si qëndron pjesa tjetër e kontinentit dhe çfarë fshihet pas këtyre ndryshimeve të thella në mënyrën si punojmë?
Një ndryshim kulturor – dhe ekonomik
Sipas Dr. Cevat Giray Aksoy, ekonomist i lartë në BERZH dhe profesor në King’s College London, suksesi i Mbretërisë së Bashkuar lidhet me disa faktorë të fuqishëm: nga struktura e tregut të punës e përqendruar në sektorë të shërbimeve si financa, media dhe konsulenca, te kultura e fortë e individualizmit që nxit vetëmenaxhimin dhe punën e pavarur.
“Britanikët kanë zhvilluar një preferencë të qëndrueshme për punën hibride. Kjo nuk është më një përfitim shtesë, por është kthyer në pritshmëri bazë,” thekson Aksoy. Ai paralajmëron se kompanitë që refuzojnë fleksibilitetin mund të humbasin talentin më të mirë, sidomos në konkurrencë me vende të tjera anglishtfolëse.
Finlanda, Gjermania dhe Portugalia: Shembuj të tjerë të suksesshëm
Në kontinent, Finlanda (1.7 ditë) dhe Gjermania (1.6 ditë) ndjekin Britaninë, ndërsa Portugalia renditet gjithashtu lart me 1.5 ditë. Hungaria dhe Holanda ndajnë të njëjtin mesatare: 1.4 ditë në javë punë nga shtëpia.
Lexo edhe: Ardhmir Malziu/ I vetmi shqiptar i zgjedhur në NYC futet në Power 100!
Vendet si Italia, Suedia dhe Çekia raportojnë rreth 1.3 ditë në javë – ende mbi mesataren globale prej 1.2 ditësh. Rumania, Spanja dhe Austria ndodhen pikërisht në këtë mesatare.
Greqia në fund të listës: Pse?
Ndër vendet evropiane, Greqia renditet e fundit me vetëm 0.6 ditë në javë punë nga shtëpia. Sipas Aksoy, ky nivel i ulët shpjegohet me strukturën e ekonomisë greke, e mbështetur fort në turizëm, tregti dhe shërbime që kërkojnë praninë fizike. Por edhe faktorët kulturorë dhe menaxherialë luajnë rol.
“Greqia ka nivel të ulët të individualizmit dhe adoptimi digjital ka qenë i ngadaltë përpara pandemisë,” shpjegon ai.
Vendet nordike, një tablo e përçarë
Edhe pse Finlanda renditet lart në listë, Norvegjia dhe Danimarka raportojnë shifra shumë më të ulëta, vetëm 0.9 ditë në javë. Suedia qëndron në mes me 1.3 ditë. Kjo tregon për një ndarje të qartë të qëndrimeve ndaj punës nga distanca, edhe brenda rajonit nordik.
“Finlanda ka përqafuar më herët fleksibilitetin dhe vetëvendosjen, veçanërisht në sektorin publik dhe teknologji,” thekson Aksoy.
Gjigantët evropianë: Franca, surprizë me nivelin më të ulët
Ndër pesë ekonomitë më të mëdha të Evropës, Franca ka nivelin më të ulët të punës nga shtëpia, me vetëm 1 ditë në javë. Turqia ndjek me 0.9, ndërsa Polonia raporton 1.1 ditë, pak mbi mesataren globale.
Sipas të dhënave të G-SWA, niveli global i punës nga shtëpia është në rënie: nga 1.6 ditë në 2022, në 1.33 në 2023 dhe vetëm 1.27 ditë në 2024-2025. Megjithatë, Aksoy thekson se kjo stabilitet nuk do të thotë stagnim.
“Tendencat e reja teknologjike, ndryshimet demografike dhe transformimet e tregut të punës mund të shkaktojnë ndryshime të reja në vitet që vijnë,” paralajmëron ai.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
