Funksioni i ri i Google, i njohur si AI Overviews, i cili synon të japë përgjigje të shpejta për pyetjet e përdoruesve, është bërë objekt kritikash për përhapjen e informacionit të pasaktë dhe shpeshherë të rrezikshëm.
Sipas The Times of London, në një rast të pazakontë, inteligjenca artificiale e Google sugjeroi që të shtohet ngjitës në salcën e picës për ta bërë djathin të ngjitet më mirë. Në një shembull tjetër, AI prezantoi si shprehje të vërtetë idiomën e sajuar “You can’t lick a badger twice”. Këto gabime, të cilat në fushën e teknologjisë njihen si “haluçinacione”, kanë ngritur shqetësime serioze për ndikimin që AI ka mbi besueshmërinë e informacionit në internet dhe mbi trafikimin e vizitorëve drejt mediave të pavarura. Në vend që të drejtojë përdoruesit drejt faqeve të mirëfillta, AI Overviews ofron një përmbledhje të gjeneruar automatikisht, duke shoqëruar përgjigjen me shumë pak burime të jashtme. Një studim i zhvilluar nga Laurence O’Toole, themelues i platformës analitike Authoritas, tregoi se klikimet drejt faqeve të internetit bien me 40% deri në 60% kur shfaqet ky funksion i ri i Google. “Edhe pse shumica e këtyre kërkimeve nuk janë shumë të zakonshme, ato zbuluan qartë disa fusha ku duhej përmirësim,” tha Liz Reid, drejtore e kërkimit në Google, duke komentuar incidentin e salcës me ngjitës.
Lexo edhe:Kërcënimi i padukshëm: Si AI po fshin vendet e punës në filma dhe televizione
Google e cilësoi raportimin si të pasaktë. “Ky artikull arrin në përfundime të ekzagjeruara dhe të pasakta, bazuar në një rast të ndodhur më shumë se një vit më parë,” tha një zëdhënës i kompanisë për New York Post. “Ne kemi prova që AI Overviews e përmirëson përvojën e kërkimit dhe shumica dërrmuese e përdoruesve e preferojnë këtë funksion.” AI Overviews është lançuar verën e kaluar dhe mbështetet nga modeli i avancuar i gjuhës Gemini, një teknologji e ngjashme me ChatGPT të OpenAI. Pavarësisht shqetësimeve të publikut, CEO i Google, Sundar Pichai, e ka mbrojtur këtë sistem, duke deklaruar për The Verge se ndihmon përdoruesit të eksplorojnë një gamë më të gjerë informacioni. “Kemi parë se po orientojmë përdoruesit drejt më shumë burimeve dhe botuesish sesa më parë,” tha ai.
Sidoqoftë, vetë kompania duket se minimizon përmasat e problemeve. Kur një gazetar kërkoi të dinte sa shpesh gabon AI, sistemi pretendoi se shkalla e “haluçinimeve” ishte midis 0.7% dhe 1.3%. Por sipas të dhënave të platformës Hugging Face, kjo përqindje për modelin më të fundit Gemini arrin në 1.8%. Në disa raste, sistemi jep përgjigje që duket se e mbrojnë vetveten. Kur pyetet nëse AI “vjedh” artin, përgjigja ishte: “nuk e vjedh në kuptimin tradicional.” Kur u pyet nëse njerëzit duhet të kenë frikë nga AI, përgjigjja analizoi disa shqetësime, por përfundoi se “frika mund të jetë e ekzagjeruar”. Ekspertët paralajmërojnë se me rritjen e kompleksitetit të këtyre sistemeve, rritet edhe rreziku për gabime të pashpjegueshme – madje as nga vetë krijuesit e tyre. Shqetësimet për gabimet e AI nuk ndalen te Google. Edhe OpenAI ka pranuar se modelet e saj më të fundit, të njohura si o3 dhe o4-mini, kanë një tendencë më të lartë për të “haluçinuar” krahasuar me versionet e mëparshme. Testimet e brendshme zbuluan se modeli o3 gjeneronte informacione të pavërteta në 33% të rasteve, ndërsa o4-mini në 48%, sidomos kur u kërkonte të jepnin informacion mbi persona realë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
