Microsoft ka paralajmëruar përdoruesit e aplikacionit Authenticator që të ruajnë të gjitha fjalëkalimet e tyre përpara se kompania të nisë fazën e ndërprerjes së funksionaliteteve të menaxhimit të fjalëkalimeve, duke filluar nga muaji qershor.
Microsoft Authenticator, i njohur gjerësisht për ofrimin e autentifikimit me dy faktorë për llogaritë online, ka shërbyer gjithashtu edhe si mjet për ruajtjen dhe plotësimin automatik të fjalëkalimeve në aplikacione dhe faqe interneti. Por duke nisur nga data 1 qershor, aplikacioni nuk do të lejojë më ruajtjen e fjalëkalimeve të reja, pasi Microsoft po e zhvendos këtë funksion në shfletuesin Edge.
Nga data 1 korrik, funksioni i autofill në aplikacionin Authenticator do të çaktivizohet plotësisht, ndërsa të gjitha informacionet e ruajtura për pagesa përfshirë kartat e kreditit do të fshihen. Microsoft ka sqaruar se të dhënat e pagesave nuk do të transferohen automatikisht në Edge, ndaj përdoruesit do të duhet t’i ri-shtojnë manualisht të gjitha informacionet përkatëse.
Lexo edhe:Kozeta Garret, shqiptarja që udhëheq sigurinë kibernetike në Microsoft!
Në gusht, të gjitha fjalëkalimet e ruajtura më parë në aplikacionin Authenticator do të hiqen përfundimisht.
Përdoruesit që dëshirojnë të vazhdojnë të përdorin fjalëkalimet dhe akseset e tyre pas kësaj date, duhet të instalojnë shfletuesin Microsoft Edge në telefonat dhe pajisjet e tyre të tjera. Microsoft deklaron se ky ndryshim synon të unifikojë dhe të përmirësojë përvojën e menaxhimit të fjalëkalimeve nëpërmjet platformës së integruar të Edge në të gjitha pajisjet.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
