Gabimet mjekësore ende rrezikojnë pacientët, por AI mund të jetë shpëtimi

Gabimet me medikamentet, si dhënia e ilaçit të gabuar apo e dozës së pasaktë  janë ndër problemet më të shpeshta në mjekësi, duke prekur rreth 1 në 20 pacientë dhe duke shkaktuar mbi 1.3 milion dëme në SHBA çdo vit, sipas OBSH.

Në një ambient kaotik si salla e operacionit, këto gabime ndodhin shpesh gjatë situatave urgjente. Pikërisht për t’i parandaluar, Dr. Kelly Michaelsen nga UW Medicine në Seattle, së bashku me kolegët e saj, ka zhvilluar një teknologji inovative: syze të zgjuara me kamera të drejtuara nga inteligjenca artificiale, që skanojnë etiketat e shiringave dhe flakonëve për të kapur gabimet para se të ndodhin.

Kjo teknologji zbulon gabime të njohura si “vial swap” (ndryshim flakoni), që përbëjnë rreth 20% të gabimeve të medikamenteve, me saktësi 99.6%, sipas një studimi të botuar së fundmi. Pajisja, e ndërtuar në bashkëpunim me departamentin e shkencave kompjuterike të Universitetit të Washingtonit, nuk ruan të dhëna dhe fokusohet vetëm te etiketat, për të ruajtur privatësinë.

Lexo edhe: A mundet AI të kurojë kancerin? Një start-up francez po përpiqet ta bëjë realitet

Për përdorim praktik, ekipi po teston alarme zanore diskrete, për të shmangur “lodhjen nga alarmet” dhe ndërprerjet e panevojshme gjatë operacioneve. Sipas anestezistit John Wiederspan, që e ka testuar pajisjen, teknologjia ka potencial të madh, veçanërisht në ambiente me presion të lartë si urgjenca apo reanimacioni.

Megjithëse teknologjia nuk është zgjidhje magjike, ekspertët thonë se AI mund të jetë një “sy i dytë” shumë i dobishëm në situata kritike. Rreziqet etike dhe të privatësisë ekzistojnë, si edhe frika se mjekët mund të bëhen tepër të varur prej saj. Por nëse përdoret me kujdes, AI mund të shpëtojë jetë duke shtuar sigurinë dhe ulur ngarkesën mendore të stafit mjekësor.

“Koha është vendimtare në një emergjencë. Nëse AI na ndihmon të fitojmë edhe pak sekonda për të qenë më të përqendruar te pacienti, atëherë ia vlen,” – tha Wiederspan.