TikTok ka lançuar një risinë më të fundit në platformën e saj: funksionin “TikTok AI Alive”, i cili përdor inteligjencën artificiale për të transformuar imazhet statike në video dinamike, brenda seksionit TikTok Stories.
Ky funksion u jep mundësi përdoruesve që të gjallërojnë fotografitë e tyre përmes efekteve vizuale dhe zanore. Për shembull, një pamje e thjeshtë e detit dhe qiellit mund të shndërrohet në një video ku retë lëvizin, ngjyrat e qiellit ndryshojnë, dhe dëgjohen tingujt relaksues të dallgëve.
“TikTok AI Alive” vjen si vazhdim i një iniciative të mëparshme të kompanisë për krijimin e imazheve nga tekstet, dhe është një përgjigje e drejtpërdrejtë ndaj garës në rritje me Instagram dhe Snapchat, të cilat tashmë ofrojnë mjete të ngjashme të bazuara në AI për përmbajtje kreative. TikTok po bën hapin tjetër në këtë garë, duke kaluar nga imazhet në video, ndërkohë që Snapchat ka njoftuar se së shpejti do të lançojë një funksion të ngjashëm.
Platforma thekson se ka vendosur masa sigurie për të parandaluar shkeljet e politikave të saj. Përmbajtja e krijuar do të kalojë përmes një procesi rishikimi përpara se të publikohet, me qëllim garantimin e një mjedisi të sigurt dhe të kontrolluar për përdoruesit.
Kjo lëvizje e TikTok shënon një hap të rëndësishëm në evolucionin e platformave sociale drejt integrimit më të thellë të inteligjencës artificiale në krijimtarinë digjitale.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
