Astronomët kanë bërë një zbulim intrigues që mund të përmbysë të gjithë njohuritë tona mbi strukturën e universit dhe mënyrën sesi ai zgjerohet. Së fundmi, shkencëtarët kanë zbuluar se energji e errët — forca misterioze që ndihmon në përshpejtimin e zgjerimit të universit mund të jetë duke u dobësuar me kalimin e kohës.
Këto të dhëna mund të vënë në pikëpyetje modelin standard kozmologjik të njohur si lambda-materia e ftohtë e errët (LCDM), i cili merr parasysh energjinë e errët, materien e zakonshme dhe materien e ftohtë të errët, një formë hipotetike e materies që lëviz më ngadalë se shpejtësia e dritës. Simboli lambda në këtë model i referohet konstantës kozmologjike të Albert Einstein, e cila supozon se universi po zgjerohet me një ritëm të pandryshueshëm. Megjithatë, vitin e kaluar, studiuesit arritën në përfundimin se energjia e errët mund të mos jetë konstante. Duke analizuar vëzhgimet e realizuara nga Dark Energy Spectroscopic Instrument (DESI) në Arizona, siç raporton New Scientist, ata zbuluan se kjo forcë misterioze mund të jetë në evolucion dhe të dobësohet me kalimin e kohës.
Në muajin mars, shkencëtarët publikuan një studim pasues që forcon më tej këto gjetje të pazakonta. “Kjo është emocionuese mund të vërë në rrezik modelin standard të kozmologjisë,” tha Yashar Akrami, profesor kërkues në Autonomous University of Madrid, për New Scientist. Në vend që të ndryshojnë modelin LCDM, Akrami dhe kolegët e tij kanë sugjeruar rishikimin e konceptit të energjisë së errët si një fushë kuintesence një ide që është përdorur për të shpjeguar vëzhgimet mbi përshpejtimin e zgjerimit të universit. Kjo qasje mund të ndihmojë në përafrimin e teorisë së fijes me modelin standard kozmologjik. “Nëse vërtetohet se kuintesenca është energjia e errët, kjo do të ishte shumë pozitive për komunitetin e teorisë së fijes,” tha Akrami për New Scientist.
Lexo edhe:Sistemi ynë Diellor mund të ketë vërtet 9 planetë, sugjeron një studim i ri
“Pikërisht për këtë arsye, komuniteti i teorisë së fijes është shumë entuziast tani.” Një interpretim i ri i modelit të kuintesencës sugjeron gjithashtu se kjo forcë misterioze mund të ndërveprojë me vetë gravitetin. “Ne gjithmonë kemi menduar se universi përshkruhet nga forca gravitacionale, dhe graviteti është thelbësor për gjithçka,” tha astrofizikani Pedro Ferreira nga University of Oxford. “Por tani mund të kemi edhe një forcë të pestë, që vjen nga energjia e errët, e cila gjithashtu ndikon gjithçka.”
Megjithatë, përpara se të pranojmë ekzistencën e kësaj force të pestë, duhet të përballemi me faktin se deri tani nuk ka prova të qarta për të, të paktën jo kur bëhet fjalë për matjet e sakta në zonën tonë të afërt të universit. “Fizika duket se është edhe më komplekse sesa kemi menduar, dhe kjo të bën të pyesësh veten, pse duhet të ecim në këtë drejtim?” shtoi Ferreira. Sipas tij, është më e mundshme që shkencëtarët do të vazhdojnë të debatojnë mbi modele të ndryshme të energjisë së errët pa arritur ndonjëherë në një përfundim përfundimtar. Megjithatë, ekziston ende mundësia që kërkuesit të vëzhgojnë ndikimin e energjisë së errët mbi gravitetin përmes vëzhgimeve të ardhshme nga Euclid i European Space Agency dhe nga DESI.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
