Amazon ka bërë një hap të rëndësishëm drejt së ardhmes së logjistikës, ka krijuar një robot magazinimi që nuk vetëm sheh dhe lëviz, por edhe ndien. I quajtur Vulcan, ky robot inovativ është projektuar për të përmirësuar ndjeshmërinë taktike, duke e afruar gjithnjë e më shumë automatizimin me aftësitë e punëtorëve njerëzorë në qendrat e shpërndarjes së Amazon.
Lexo gjithashtu: Rregullorja për sigurinë kibernetike, operatorët e energjisë duhet të certifikohen
Vulcan përdor ndjesinë e prekjes për të lëvizur mes rafteve dhe për të identifikuar produktet që duhet të paketohen. Aaron Parness, drejtori i robotikës AI në Amazon, shpjegon: “Kur përpiqesh të marrësh ose të vendosësh artikuj në një nga këto module, është e pamundur ta bësh këtë pa kontaktuar edhe me artikujt e tjerë. Ndjesia e prekjes është thelbësore.”
Sistemi Vulcan përbëhet nga një krah robotik klasik, por me një shtesë të veçantë në formë spatule që shërben për të lëvizur produktet dhe një thithëse që kap sendet për t’i nxjerrë nga raftet. Sensoret e integruar në kyçet e robotit lejojnë identifikimin e kontureve dhe skajeve të artikujve, ndërsa një algoritëm i avancuar AI interpreton të dhënat dhe udhëheq lëvizjet e tij.
Ky zhvillim i ri është zbuluar në një qendër shpërndarjeje në Hamburg, Gjermani, dhe Vulcan tashmë është duke punuar edhe në një qendër tjetër në Spokane, SHBA. Robotët punojnë krah për krah me njerëzit, duke marrë përsipër detyra të lodhshme ose që kërkojnë shtrirje në lartësi apo thellësi të mëdha. Nëse Vulcan nuk mund të gjejë një artikull, detyra kalon menjëherë tek operatorët njerëzorë.
Lexo gjithashtu: Trump për Tiktok: “Kam një dobësi për këtë app, do e shtyja afatin sërish!”
Ekspertët janë të impresionuar, por edhe realistë mbi sfidat. Ken Goldberg, profesor robotike në Universitetin e Kalifornisë, Berkeley, thekson: “Ndjesia e prekjes njerëzore është jashtëzakonisht e ndërlikuar dhe e sofistikuar. Robotët po përparojnë shpejt, por nuk pres që sensorë me ndjeshmëri të barabartë me lëkurën njerëzore të jenë realitet në 5-10 vitet e ardhshme.”
Megjithatë, ky është një hap vendimtar drejt automatizimit të zgjuar. Amazon ka shtuar ndjeshëm përdorimin e robotëve vitet e fundit, duke e bërë gjithnjë e më të zakonshme pamjen e robotëve që transportojnë dhe paketojnë produkte. Tani, falë Vulcan-it, edhe detyrat më të ndërlikuara të manipulimit dhe kapjes së artikujve – që deri më tani vareshin kryesisht nga puna e njeriut, po bëhen gjithnjë e më të arritshme për automatizim.
Parness është i qartë: “Ne nuk besojmë tek një automatizim 100%, ajo që synojmë është një bashkëpunim inteligjent mes robotëve dhe punëtorëve tanë. Kur punojnë së bashku, arrijmë më shumë.”
Dhe ndërsa teknologjia evoluon, Amazon synon t’u japë robotëve të tjerë të saj të njëjtat aftësi të ndjeshme, duke avancuar vazhdimisht drejt një të ardhmeje ku makineritë nuk janë vetëm të fuqishme, por edhe… të ndjeshme.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
