Nëse mendon se ke dështuar në një intervistë pune sepse ishe nervoz apo nuk ishe përgatitur sa duhet, mund të mos jetë fundi i botës. Një shembull konkret është Megan Rathmell, 20 vjeçarja nga Virginia, e cila ishte e bindur se kishte prishur gjithçka në intervistën për një pozicion si paralegale. Për habinë e saj, mori njoftimin që e kishte fituar vendin e punës dhe arsyeja ishte më e thjeshtë se sa e mendonte, ajo kishte komunikuar qartë dhe kishte mbajtur kontakt me sy gjatë gjithë intervistës.
Lexo: Ed Sheeran u zhduk nga skena, por ja çfarë e riktheu më të fuqishëm se kurrë
Eprori i saj i tha hapur se ishte ndër të paktët kandidatë që kishte treguar vetëbesim përmes mënyrës së komunikimit dhe që ishte përqendruar realisht në bisedë. Dhe ky nuk është një rast i izoluar. Ekspertët e rekrutimit po vënë re se shumë të rinj, sidomos ata të brezit Z, nuk dinë të prezantohen siç duhet në një intervistë pune.
Në shumë raste, sjellja e tyre shihet si jo profesionale. Ka raste kur kandidatët paraqiten me prindërit në intervista fizike, nuk e ndezin kamerën gjatë intervistave virtuale, vishen në mënyrë të papërshtatshme apo flasin me një gjuhë që nuk i përshtatet një ambienti pune. Disa nuk bëjnë as mundimin të bëjnë pyetje apo të informohen minimalisht për kompaninë ku kanë aplikuar.
Dr. Nathan Mondragon, ekspert i platformës së punësimit HireVue, thotë se ky fenomen është më i përhapur se më parë. Sipas tij, një pjesë e mirë e kandidatëve të rinj janë rritur në një realitet dixhital, larg kontaktit të drejtpërdrejtë dhe pa u ekspozuar ndaj situatave reale të komunikimit. Mungesa e përvojës me ndërveprimet ballë për ballë, e përkeqësuar nga pandemia, po i kushton shumë kandidatëve.
Lexo gjithashtu: Personi më i pasur në botë në çdo dekadë që nga vitet 1940!
Por ka edhe diçka tjetër, shumë të rinj mendojnë se mund ta kalojnë një intervistë duke “e improvizuar”, pa përgatitje konkrete. Ky është një gabim klasik që mund t’i kushtojë vendin e punës.
Ekspertët rekomandojnë që përpara çdo interviste, kandidatët duhet të informohen mirë për kompaninë, të përgatisin pyetje konkrete dhe të reflektojnë mbi përvojat që mund të jenë të vlefshme për pozicionin e kërkuar. Detaje si mënyra e veshjes, toni i zërit, vendi ku zhvillohet intervista (nëse është online) dhe mënyra e të shprehurit janë elementë kyç që ndikojnë drejtpërdrejt në përshtypjen që lë.
Një tjetër aspekt shpesh i anashkaluar është komunikimi pas intervistës. Një email falënderimi brenda 24 orëve nuk është vetëm një akt mirësjelljeje, por edhe një sinjal që tregon profesionalizëm dhe interes të vërtetë për pozicionin.
Ndërkohë, tregu i punës vazhdon të mbetet i ngarkuar dhe konkurues. Vetëm në SHBA, mbi 6.8 milionë persona janë në kërkim të një pune. Në këtë kontekst, ajo që të dallon nuk është vetëm CV-ja, por mënyra si prezanton veten, qëndrimi, përgatitja dhe aftësia për të komunikuar.
Në fund të ditës, një intervistë nuk është një test, por një mundësi për të treguar se kush je dhe çfarë mund të ofrosh. Dhe në shumë raste, nuk është përsosmëria që kërkohet… por autenticiteti dhe qëndrimi i duhur.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
