Takimi i dytë i klubit të librit Bytes & Books u zhvillua mbrëmjen e djeshme mes lexuesish që ndajnë një pasion të përbashkët për librat që shpalosin lidhjen mes teknologjisë dhe shoqërisë. Këtë herë, në qendër të bisedës ishte “Vala që po vjen” nga Mustafa Suleyman – një prej librave më të përfolur të viteve të fundit mbi inteligjencën artificiale dhe bioteknologjinë.
Nuk ishte një diskutim i zakonshëm. Libri ngjalli reagime , nga entuziazmi për potencialin që teknologjia ofron, deri te reflektimet mbi rreziqet e saj. Pjesëmarrësit ndanë përshtypjet e tyre, jo vetëm si lexues, por edhe si qytetarë që jetojnë në kohën kur AI nuk është më një koncept i largët, por një realitet që po ndikon gjithnjë e më shumë jetën tonë të përditshme.
Një nga temat që ndezi më shumë diskutime ishte dilema thelbësore: A është teknologjia vetëm një mjet në shërbim të njeriut, apo po kthehet ngadalë në një qëllim në vetvete? Nga sistemi shëndetësor e deri te mënyra si funksionojnë qytetet, nga etika e zbulimeve gjenetike te sfidat e keqinformimit, pjesëmarrësit sollën perspektiva të ndryshme mbi pyetjen që Suleyman shtron në mënyrë të qartë në libër: si mund ta mbajmë nën kontroll një teknologji që është, në thelb, e pakontrollueshme?
Ajo që e bëri këtë takim të veçantë nuk ishte vetëm përmbajtja e librit, por mënyra si ai shërbeu si nxitës për një reflektim më të gjerë. Në vend të ndarjes klasike “optimistë” apo “pesimistë”, diskutimi solli një qasje të matur: një përpjekje për të kuptuar drejtimin e “valës” dhe për të kuptuar çfarë do të thotë të jesh i përgatitur për të.
Lexo edhe:Pse duhet lexuar “Vala që po vjen”?
Në përfundim, mbeti një frymë bashkëbisedimi që është aq e rrallë në diskutimet publike për teknologjinë: e bazuar në dije, por edhe në ndjeshmëri njerëzore. “Vala që po vjen” nuk u lexua vetëm si një paralajmërim, por si një mundësi për të ndërtuar një vetëdije të re , e cila na sfidon të mos jemi thjesht përdorues të teknologjisë, por edhe bashkëformësues të saj.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
