Nga vizion në veprim, si Evropa po punon që të kthehet në superfuqinë botërore të AI-së

Bashkimi Evropian synon të bëhet lider global në fushën e inteligjencës artificiale (AI), duke nxitur zhvillimin dhe zbatimin e zgjidhjeve të AI-së që sjellin përfitime për shoqërinë dhe ekonominë. Komisioni Evropian ka paraqitur planin e veprimit “Kontinenti i AI-së” për të kthyer pikat e forta të BE-së, si talenti i jashtëzakonshëm dhe industritë tradicionale të fuqishme, në nxitës të zhvillimit të AI-së. Ky plan ambicioz synon të shfrytëzojë potencialin ende të pashfrytëzuar të studiuesve dhe industrive evropiane, për të formësuar fazën e ardhshme të zhvillimit të AI-së, duke nxitur rritjen ekonomike dhe fuqizuar konkurrueshmërinë në fusha strategjike si shëndetësia, automjetet, shkenca dhe të tjera.

Plani ndërtohet mbi nismën InvestAI, që synon të mobilizojë 200 miliardë euro investime në fushën e AI-së brenda BE-së. Qëllimi është të forcohen kapacitetet evropiane përmes pesë shtyllave kryesore:

 1. Ndërtimi i infrastrukturës kompjuterike në shkallë të gjerë
Modelet e avancuara të AI-së kërkojnë investime të mëdha, infrastrukturë të specializuar dhe bashkëpunim të gjerë. Plani përfshin:

• Krijimin e të paktën 13 “fabrikave të AI-së” në mbarë Evropën, duke përdorur rrjetin evropian të superkompjuterëve. Ato do të mbështesin startup-et, industrinë dhe kërkimin shkencor në zhvillimin e modeleve dhe aplikacioneve më të avancuara të AI-së.
• Themelimin e deri në 5 “gjigafabrikave të AI-së”, qendra të mëdha me fuqi të jashtëzakonshme kompjuterike dhe kapacitete të mëdha të të dhënave, të cilat do të mundësojnë trajnim të modeleve komplekse të AI-së në shkallë të paprecedentë.
• Aktivizimin e instrumentit financiar InvestAI, që do të mobilizojë 20 miliardë euro investime private për gjigafabrikat.
• Propozimin e një akti për zhvillimin e cloud-it dhe AI-së, që do të nxisë investimet private në qendrat e të dhënave, me synimin për të trefishuar kapacitetin e qendrave të të dhënave të BE-së në 5–7 vitet e ardhshme, me theks në qëndrueshmëri.

 Lexo edhe: Si po e transformon Inteligjenca Artificiale sektorin e Burimeve Njerëzore, sfidat dhe rreziqet

2. Rritja e aksesit në të dhëna cilësore
Të dhënat e mëdha dhe cilësore janë thelbësore për trajnimin e AI-së. Plani përfshin:

• Prezantimin e strategjisë për “bashkimin e të dhënave”, që synon të krijojë një treg të brendshëm të vetëm për të dhënat dhe të mundësojë shkallëzimin e zhvillimit të AI-së në të gjithë BE-në.
• Krijimin e laboratorëve të të dhënave brenda fabrikave të AI-së për të mbledhur e organizuar të dhëna me cilësi të lartë nga burime të ndryshme.

3. Promovimi i AI-së në sektorët strategjikë

Aktualisht, vetëm 13.5% e ndërmarrjeve në BE përdorin AI. Për të mbyllur këtë boshllëk, Komisioni do të nisë:

• Strategjinë “Apply AI”, që synon të rrisë përdorimin e AI-së në industri.
• Integrimin e AI-së në sektorët publikë dhe në shëndetësi.
• Zbatimin e strategjisë përmes fabrikave të AI-së dhe Qendrave Evropiane për Inovacion Digjital (EDIH).

4. Fuqizimi i aftësive dhe talenteve në AI
Për të përmbushur kërkesën në rritje për profesionistë në AI, BE-ja do të:

• Lehtësojë rekrutimin ndërkombëtar, përfshirë hapjen e rrugëve të ligjshme për migrimin e talenteve të larta jashtë BE-së.
• Tërheqë dhe mbajë talentet më të mira duke sjellë studiues dhe ekspertë në Evropë.
• Nisë programe edukimi dhe trajnimi për AI dhe AI gjenerative në sektorët kryesorë, për të përgatitur brezin e ri të specialistëve dhe për të ndihmuar punonjësit të fitojnë aftësi të reja.

 5. Thjeshtimi i zbatimit të Aktit për AI
BE-ja do të mbështesë kompanitë dhe shtetet anëtare në zbatimin e Aktit për AI, duke ofruar:

• Udhëzime zyrtare dhe kode praktike.
• Shërbimin e ri “AI Act Service Desk”, një pikë qendrore kontakti për bizneset që kërkojnë informacion dhe orientim rreth ligjit të AI-së.

Evropa ka potencialin për të udhëhequr botën në epokën e re të inteligjencës artificiale. Me këtë plan të guximshëm, ajo po krijon themelet për një të ardhme më të zgjuar, më të qëndrueshme dhe më konkurruese.

Burimi: Komisioni Evropian/ Përshtati: Businessmag.al